«ԶԱՐԹՕՆՔ», ՊԷՅՐՈՒԹ – Փտածութեան դէմ պայքարի պետական նախարարի պաշտօնակատար Նիքոլաս Թուէնի Շաբաթ անդրադարձաւ Պէյրութի օդակայանի ճանապարհորդային գերխճողուածութեան եւ պահանջեց պաշտօնատարներէն շուտափոյթ լուծում գտնել անոր յարադէպ աճին:
«Պէտք չէ լուռ վերաբերին այս իրադրութեան: Մեր երկիրը զբօսաշրջավայր է: Հետեւաբար, պատկան մարմինները պէտք է առաւելագոյնս աշխատին ճանապարհորդութեան առնչուող հարցերու հանգուցալուծման ուղղութեամբ»,- ըսաւ Թուէնի ազգային լրատուական գործակալութեան կողմէ հրապարակուած յայտարարութեան մէջ:
Յայտնենք, որ Լիբանանի միակ օդակայանը, որուն այժմեան կարողականութիւնը վեց միլիոն է, տարեկան դրութեամբ կ’ընդունի աւելի քան ութ միլիոն ճանապարհորդ, ինչ որ զգալիօրէն դուռ կը բանայ բազմաբղէտ խնդիրներու:
