Ուրբաթ, 19. 07. 2024

spot_img

Հիասքանչ Բնութիւնը Կը Հանդիպի 3000-ամեայ Մշակոյթի Պատմութեան. Գերմանական Reise-Stories-ի Յօդուածը Հայաստանի Մասին

Գերմանական Reise-Stories ճամբորդական կայքէջը Գերմանիոյ մէջ ՀՀ դեսպանութեան աջակցութեամբ յօդուած հրապարակած է Հայաստանի վերաբերեալ` «Հայաստան – հիասքանչ բնութիւնը կը հանդիպի 3000-ամեայ մշակոյթի պատմութեան» վերնագիրով:  «Արմենփրես»-ը կը ներկայացնէ յօդուածի հակիրճ թարգմանութիւնը:

«Երբ առաջին անգամ կը մեկնիս Հայաստան, կը հասկնաս, որ արժէ այցելել այս երկիրը, որ աշխարհի մէջ առաջինն է՝ պետականօրէն ընդունած է քրիստոնէութիւնը: Հայաստանի մայրաքաղաք Երեւանը աշխարհի ամենահին քաղաքներէն է: Այստեղ կը գտնուի Մատենադարանը, ուր կը պահպանուին շուրջ 15.000 հայկական եւ 5.000 արտասահմանեան ձեռագիրներ: Ձեռագիրներու շատ նմուշներ եզակի են եւ քանի մը հարիւր կամ հազար տարուան պատմութիւն ունին, ինչպէս օրինակ` 986 թուականի Սանասարեան Աւետարանը կամ 12-րդ դարու աշխարհի քարտէսը:

«Երեւանի մէջ անպայման անհրաժեշտ է նաեւ այցելել Հայոց Ցեղասպանութեան զոհերու յուշահամալիր: Յուշահամալիրի տարածքին տարբեր երկիրներու քաղաքական գործիչներ, ի յիշատակ Ցեղասպանութեան 1,5 միլիոն անմեղ զոհերու, ծառեր տնկած են:

«Մայրաքաղաք Երեւանէն մօտ 60 քմ հեռաւորութեան վրայ կը գտնուի Սեւանայ լիճը` Հայաստանի կապոյտ մարգարիտը: 1272 քմ² տարածքով այս լիճը աւելի քան երկու անգամ մեծ է, քան գերմանական Պոտենզէէ լիճը:  Դէպի հարաւ տանող ճանապարհին կը գտնուի Նորատուզի գերեզմանատունը: Այստեղ կան 9-16-րդ դարերու բազմաթիւ եզակի խաչքարեր:

«Արարատ լեռը, որ ունի 5137մ բարձրութիւն եւ որու գագաթը տարուան մեծ մասը պատուած է ձիւնով, կը գտնուի Թուրքիոյ կողմը: Լեռը հայերու ազգային խորհրդանիշն է: Մինչ 1915-ի Ցեղասպանութիւնը Արարատի շրջակայքը  հայեր բնակած են: Ըստ Աստուածաշունչի` մեծ ջրհեղեղէն ետք Արարատ լերան վրայ հանգրուանած է Նոյեան տապանը: Տպաւորիչ այս լեռը մօտիկէն տեսնելու համար կարելի է երթալ Խոր Վիրապ վանք: Այս սրբավայրը յայտնի ուխտատեղի է»:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին