2018 Յուլիս 1-ի դրութեամբ՝ Հայաստանի մէջ կենսաթոշակառուներու քանակը կազմած է 461,068 մարդ, որ ՀՀ մշտական բնակչութեան 15.5%-ն է: Ազգային վիճակագրական ծառայութեան տուեալներուն համաձայն՝ 2017-ի նոյն ժամանակահատուածին (464,698 կենսաթոշակառու) համեմատ, երկրին մէջ կենսաթոշակառուներուն թիւը նուազած է մօտ 1%-ով:
Ըստ ՀՀ աշխատանքի եւ հասարակական հարցերու նախարարութեան հասարակական ապահովութեան տուեալներուն՝ աշխատանքային կենսաթոշակառուներուն քանակը կազմած է 458,532, զինծառայութեան հետ կապուած կենսաթոշակառուներուն քանակը` 1905, այլ օրէնքներով սահմանուած կենսաթոշակ ստացող կենսաթոշակառուներուն քանակը՝ 631 մարդ:
Կենսաթոշակառուներուն նշանակուած կենսաթոշակին միջին չափը կազմած է 40,548 դրամ, որ քիչ մը բարձր է նախորդ տարուան միջին չափին՝ 40,347 դրամի համեմատ:
ՀՀ մշտական բնակչութիւնը, ըստ ազգային վիճակագրական ծառայութեան տուեալներուն, Յուլիս 1-ի դրութեամբ կազմած է 2,969,800 մարդ:
