Հինգշաբթի, 25. 07. 2024

spot_img

ՀԵԸ Սկաուտական Շարժումը Հայրենիքի Մէջ Մասնակցեցաւ ՀԲԸՄ-ի «Անդրանիկ» Տարեկան Բանակումին

 Նախորդ տարիներու  նման այս տարի եւս, ՀԵԸ-ի սկաուտական  զոյգ մասնաճիւղերը  ներկայացնող  խմբաւորում մը   մեկնեցաւ հայրենիք,  մասնակցելու  ՀԲԸՄ-ի «Անդրանիկ» տարեկան բանակումին:

Երեքշաբթի, 10 Յուլիս 2018-ի վաղ  առաւօտեան, ՀԵԸ  Անդրանիկ Անթիլիասը եւ ՀԵԸ Անդրանիկ Սեւանը ներկայացնող սկաուտական  միացեալ խմբակ մը, ՀԲԸՄ-ի Տեմիրճեան կեդրոնէն, քոյր՝  Ալին Սէֆէրեանի գլխաւորութեամբ, մեկնեցաւ Հայաստան, մասնակցելու՝ ՀԲԸՄ-ի նախաձեռնութեամբ աւանդութիւն  դարձած տարեկան  «Անդրանիկ»   ընդհանուր  բանակումին: 

Բանակումի մեկնող  ՀԵԸ-ի  սկաուտական շարժումի անդամ-անդամուհիները  ՀԲԸՄ-ի Տեմիրճեան  կեդրոնէն  օթոպիւսով   ուղղուեցան  դէպի Պէյրութի   միջազգային  օդակայան:  Օդանաւը  բարեյաջող վայրէջք կատարեց   Զուարթնոցի  միջազգային  օդակայանը, ուր  ՀԲԸՄ-ի Երեւանի  սկաուտական  շարժումի պատասխանատուներ  դիմաւորելէ ետք  Լիբանանէն ժամանած   ՀԵԸ-ականները, զանոնք անմիջապէս փոխադրեցին  իրենց կացարանը՝ Դիլիջան, Լոռիի մարզ՝  Թէժ  Լեռ,  ՀԲԸՄ-ի «Անդրանիկ»  բանակավայր:

ՀԲԸՄ-ի  «Անդրանիկ» բանակումին  կը մասնակցէին Լիբանանէն, Սուրիայէն,  Իրաքէն, Իրանէն,  Հայաստանէն, Վրաստանէն  ժամանած ՀԲԸՄ-ի սկաուտական  զանազան խումբեր:

Բանակավայրին մէջ   մեր սկաուտները   մասնակցեցան   խմբային, դաստիարակչական խաղերու, լսեցին  զեկոյցներ, աւելի մօտէն  ծանօթացան  այլ  երկիրներէ  ժամանած իրենց քոյրերուն եւ  եղբայրներուն:

 Բանակումին պատասխանատուները   իրենց ծրագիրներուն մէջ ընդգրկած էին  այցելութիւններ դէպի  Հայաստանի   գեղատեսիլ վայրերը:

Աւանդական խարուկահանդէսը տեղի ունեցաւ  15  Յուլիսին:  Բանակավայրին մէջ կը  տիրէր մեծ ոգեւորութիւն:

Բանակումը աւարտեցաւ 19  Յուլիսին:  Լիբանանը ներկայացնող   ՀԵԸ-ի սկաուտական խմբակը    Երեւանի մէջ  տեղաւորուեցաւ  ՀԲԸՄ-ի Կարապետեան Տունը:   Այս  միջոցին անոնք ծանօթացան Երեւանի  արուարձաններուն: Անոնք  այցելեցին  Հայորդաց  Տուն եւ   լիացան   տաղանդաւոր  մանուկներու պատրաստած   գեղարուեստական  յայտագիրով:  Յաջորդող օրերուն անոնք այցելեցին Ծիծեռնակաբերդ,  Սուրբ էջմիածին, Սարդարապատ:   Սուրբ Էջմիածնի մէջ   մեր սկաուտներուն դիմաւորեց Ամենայն Հայոց   Գարեգին Բ.  կաթողիկոսը:  Այս առիթով  Հայոց Հայրապետը  փոխանցեց  իր  օրհնութիւնը  եւ բարեմաղթութիւնները: :

  Մեր սկաուտները   Երեքշաբթի, 24  Յուլիսին  բարձր  տրամադրութիւններով  եւ փայլուն  յիշատակներով  վերադարձան  Պէյրութ:

                                                              ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ  ԳՐԱՍԵՆԵԱԿ

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին