Վարչապետ Նիկոլ Փաշինեան ընդունած է ԵԱՀԿ գործող նախագահի՝ կաշառակերութեան դէմ պայքարի հարցերով յատուկ ներկայացուցիչ Փաոլա Սեւերինօն: Ինչպէս կը փոխանցէ «Արմէնփրես»-ը, ՀՀ վարչապետի աշխատակազմի տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ վարչապետը կարեւորած է ԵԱՀԿ-ի հետ համագործակցութեան հետագայ զարգացումը տարբեր հարթութիւններու վրայ, ներառեալ՝ հակակաշառակերութեան ոլորտին մէջ:
Նիկոլ Փաշինեան ընդգծած է, որ կաշառակերութեան դէմ պայքարը կառավարութեան առաջնահերթութիւններէն մէկն է եւ այդ ուղղութեամբ գործադիրը հաստատակամօրէն պիտի շարունակէ հետեւողական քայլերը: Միաժամանակ, վարչապետը աւելցուցած է, որ Հայաստանը այս ոլորտին մէջ անհրաժեշտ կը համարէ միջազգային գործընկերներու հետ փորձի փոխանակումն ու վերջիններուս կողմէ հաւանական օժանդակութիւնը:
Փաոլա Սեւերինօն ողջունած է կաշառակերութեան դէմ պայքարին մէջ ՀՀ իշխանութիւններուն կողմէ ձեռնարկուող միջոցառումները եւ համոզում յայտնած, որ անոնք արդիւնաւէտ կ’ըլլան: Ան ընդգծած է, որ ԵԱՀԿ-ն պատրաստ է աշխոյժ համագործակցութեան ՀՀ կառավարութեան, ընդհուպ մինչեւ արդարադատութեան նախարարութեան հետ՝ հակակաշառակերութեան ոլորտին մէջ բարեփոխումներու իրականացման օժանդակութիւն ցուցաբերելու նպատակով:
Զրուցակիցները համոզում յայտնած են, որ նախատեսուող բարեփոխումները կը նպաստեն կաշառակերութեան վտանգներու նուազումին, ինչ որ, իր հերթին, կը խթանէ առեւտրական միջավայրի բարելաւումն ու արտաքին ներդրումներու ներգրաւումը:
