Կիրակի, 21. 07. 2024

spot_img

Այնճարի Հայ Աւետարանական Երկրորդական Վարժարանի Ամավերջի Հանդէս

Այնճարի Հայ աւետարանական երկրորդական վարժարանի 2017-18 տարեշրջանի ամավերջի հանդէսը տեղի ունեցաւ Ուրբաթ, 29 Յունիս 2018-ին՝ կ.ե. ժամը 6:30-ին, վարժարանի շրջափակէն ներս:

Հանդէսը ընթացք առաւ 2017-2018 տարեշրջանի 6-րդ եւ 12-րդ դասարաններու շրջանաւարտներու մուտքով, որոնք բեմ բարձրացան իրենց դաստիարակներուն եւ վարժարանի տնօրէն պատուելի Յակոբ Աքպաշարեանի առաջնորդութեամբ: Շրջանաւարտները բեմին վրայ զետեղեցին Լիբանանի եւ Հայաստանի դրօշակները ներկայացնելով հանդէսի թեման՝ անկախութիւն Լիբանանի (75-ամեակ) եւ Հայաստանի (100-ամեակ):

 

Լիբանանի եւ Հայաստանի քայլերգերու ունկնդրութենէ ետք Աստուծաշունչի ընթերցումը կատարեց վերապատուելի Հրայր Չոլաքեան, ապա վերապատուլի Յովհաննէս Յովսէփեան արտասանեց շնորհակալութեան եւ երախտագիտութեան աղօթք:

Այնուհետեւ 3 երգերով ելոյթ ունեցաւ վարժարանի «Նայիրի» երգշախումբը՝ խմբավարութեամբ Տիկ. Նեկտար Փալազեանի: Երգերն էին՝ «Աղօթք», «Լիբանան», «Հայոց աշխարհ»:

Պատուոյ ցանկի մրցանակաբաշխումէն ետք պատուելի Յակոբ Ագպաշարեան ներկաներուն փոխանցեց դպրոցական ընթացիկ տարեշրջանին վարժարանի ձեռքբերած իրագործումները, մրցանակները եւ յաջողութիւնները՝ կեդրոնանալով վարժարանին ընձեռուած օրհնութիւններուն կարեւորութեան վրայ:

Ապա 6-րդ դասարանի աշակերտները ներկայացուցին Ռոպերթ Առաքելեանի «Գովք Լիբանանի» ասմունքը, այնուհետեւ վարժարանիս «Հեքիաթ» պարախումբը ներկայացուց լիբանանեան Տապքէ պարը:

6րդ դասարանի աշակերտներէն Սելին Շաննաքեան, Սերժիօ Հապէշեան եւ Կալի Գալուստեան իրենց ուղերձներուն ընդմէջէն իրենց երախտագիտութիւնը յայտնեցին Աստուծոյ, ծնողաց եւ վարժարանին իրենց ընծայուած առիթներուն եւ օրհնութիւններուն համար:

Ապա հայկական նազպարով հանդէս եկաւ վարժարանի պարախումբը: 12րդ դասարանի աշակերտներէն Լորա Հերկելեան, Մելիսա Մարտիկեան եւ Թալին Քէնտիրճեան հայերէն, արաբերէն եւ անգլերէն լեզուներով ուղերձներուն միջոցաւ յաջորդաբար արտայայտեցին իրենց անցեալի, ներկայի եւ ապագայի մարտահրաւէրները, գաղուած դասերը եւ անմոռանալի յիշատակները յուզումով եւ երախտագիտութեամբ:

Հայաստանի Հանրապետութեան զինանշանի տարբեր մասնիկներու խորհրդանիշներն ու մեկնաբանութիւնները արտասանեցին 12-րդ դասարանի աշակերտները, որուն ընթացքին անոնք կազմեցին նաեւ Հանրապետութեան զինանշանը:

Այնուհետեւ վարժարանի աշակերտներէն Նարէ Փիլաւճեան, Սեւատա Անտոնեան եւ Նազանի Ադամեան ներկայացուցին Վարանդի «Արծուակռինչ» ասմունքը մինչ աշակերտներ կազմեցին Սարդարապատի զանգակատան կենդանի պատկերը, որմէ ետք վարժարանի պարախումբը ներկայացուց «Հայաստան Ճան» պարը:

Օրուան բանախօս, Հայկազեան համալսարանի նախագահ, վերապատեուլի դոկտ. Փօլ Հայտոսթեան, իր խօսքը ուղղելով շրջանաւարտներուն, նշեց ուսման կարեւորութիւնը, սակայն ան ըսաւ, թէ ալ աւելի կարեւոր է զարգացումը, որովհետեւ զարգացում կը նշանակէ լուսաւորութիւն եւ լուսաւորութեան պահանջ: Ան շարունակեց՝ ըսելով. «Վստահ եմ, որ այս սիրելի երկրորդական վարժարանը արդէն ձեզի սորվեցուցած է, թէ զարգացում է պէտք մտքի, հոգիի, ճաշակի, մարմինի, կարողութիւններու, զգացումներու եւ փոխյարաբերութիւններու: Այսինքն՝ բոլորս պէտք ունինք լոյսի, որպէսզի տեսնենք եւ ուրիշներ ալ տեսնեն»:

Հայտոսթեան շրջանաւարտներուն ըսաւ. «Հիմա դուք, շրջանաւարտներ, լոյսի նման պիտի փայլիք: Ձեր ճամբան պիտի տեսնէք եւ օգնէք, որ ուրիշներ ալ իրենց ճամբան տեսնեն: Այսպէս պէտք է ըլլայ ամէն գիտութեան մէջ եւ ամէն կեանքի պարագայի մէջ:  Պայմանը այն է, որ լոյսի ուղղութեամբ ճիշդ տեղերը գտնուիք՝ շինիչ բարեկամութիւններով, ուղիղ ճամբաներով, սովորութիւններով, որոշումներով: Այլապէս այն լոյսը, որ ձեր մէջ դրուեցաւ, պահուած պիտի մնայ եւ պահուած լոյսը օգուտ պիտի չունենայ: Պահուած լոյս հաւասար է մթութեան: Ճրագը չեն վառեր ու դներ տուփի մը տակ, որ լոյսին տարածումին արգելք կ’ըլլայ, այլ կը դնեն զայն մոմակալի կամ բարձր ու յայտնի դիրքի վրայ որպէսզի առանց դժուարութեան իր շրջապատին առաւելագոյնս լոյս տայ»:

Ան իր խօսքի աւարտին շնորհաւորեց շրջանաւարտները եւ իրեց ծնողները եւ մաղթեց, որ անոնք Աստուծոյ լոյսով լեցուին եւ իրենց կարգին լուսաւորեն իրենց շրջապատը:

Բանախօսութեան յաջորդեց վկայականաց բաշխումը, որուն ընթացքին 18 աշակերտներ 6-րդ դասարանէն եւ 11 աշակերտներ 12-րդ դասարանէն ստացան իրենց վկայականները, որմէ ետք 12-րդ դասարանի աշակերտները իրենց երախտագիտութիւնը յայտնեցին իրենց ծնողներուն՝ փոքր յուշանուէրներով:

Այնուհետեւ վեր. Րաֆֆի Մըսըրլեան լոյսի ջահը փոխանցեց 6-րդ եւ 12-րդ դասարանի շրջանաւարտներէն ներկայացուցիչներու, որուն ընթացքին Կասիա Պօյաճեան ներկաներուն փոխանցեց արարքին մեկնաբանութիւնը:

Հանդէսը աւարտեցաւ վարժարանի տնօրէն, պատուելի Յակոբ Ագպաշարեանի հուսկ բանքով եւ վերապատուելի Հայտոսթեանի օրհնութեան աղօթքով:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին