Շաբաթ, 13. 07. 2024

spot_img

«Վայոց Ձոր» Ելեկտրոնային Գիրքը Ներկայացուեցաւ ԱՄՆ «Ֆոլքլայֆ» Փառատօնին

Յուլիսին Ուաշինկթընի մէջ տեղի ունեցած Սմիթսոնեան «Ֆոլքլայֆ» փառատօնի այցելուները իւրայատուկ հնարաւորութիւն ունեցան Հայաստանին ծանօթանալու ոչ միայն ազգային կերակրատեսակներու, արհեստներու եւ երաժշտութեան, այլեւ արուեստագիտութեան  միջոցով: Փառատօնին ներկայացուած «Վայոց ձոր» ելեկտրոնային գիրքը հնարաւորութիւն տուաւ մասնակիցներուն առցանց ճամբորդութիւն կատարելու Հայաստանի այդ գեղեցիկ մարզը, այցելելու պատմական վայրեր, հիանալու բնութեան տեսարաններով եւ ներշնչուելու տեղական մշակոյթով:

Ել. գիրքը թողարկուած է ՀԲԸՄ Հայկական վիրտուալ համալսարանի (ՀՎՀ) եւ ԱՄՆ ՄԶԳ կողմէ ֆինանսաւորուող Սմիթսոնեան հիմնարկի «Իմ Հայաստան» ծրագիրին կողմէ: Անիկա համապարփակ ուղեցոյց է Վայոց ձորի մասին` յագեցած բազմազան multimedia-ի միջոցներով` տեսանիւթերով, եռաչափ նկարներով ու համայնապատկերներով, ձայնագրութիւններով եւ  քարտէսներով:

 «ՀՎՀ-ն հպարտութեամբ կը համագործակցի Սմիթսոնեան հիմնարկին հետ` հաւատարիմ մնալով հայկական հարուստ ժառանգութիւնն աշխարհին ներկայացնելու իր առաքելութեան, եւ ես շատ ուրախ եմ, որ «Վայոց ձոր» ելեկտրոնային գիրքը կը ներկայացուի Ֆոլքլայֆ փառատօնի ընթացքին»,- ըսաւ ՀՎՀ հիմնադիր նախագահ Երուանդ Զօրեան: «Նոր ել. Գիրքին մէջ օգտագործուած են ստեղծարար եւ ժամանակակից լուծումներ` Վայոց ձորի բնական եւ պատմական հարստութիւնը, մարզի բազմազանութիւնը լաւագոյնս ներկայացնելու նպատակով: Գիրքը իր  բովանդակութեամբ կը նպաստէ մարզին մէջ զբօսաշրջիկներու թիւի աճին»:

Բացի տարածաշրջանի պատմութեան, բնական վայրերուն, մշակոյթին եւ աւանդոյթներուն մասին գլուխներէն, գիրքը կը պարունակէ նաեւ հիւրանոցներու եւ ճաշարաններու տեղեկատու, ինչպէս նաեւ բառարանային յաւելուած` ճանապարհորդութիւնը հեշտ եւ հաճելի դարձնելու համար:

 «Ելեկտրոնային գիրքի միջոցով մարդիկ կրնան բացայայտել որեւէ վայր, տան կամ հիւրանոցին մէջ ծանօթանալով ատոր` յստակ պատկերացնելով, թէ ո՛ւր կ’ուզեն ճամբորդել… Անիկա հիանալի միջոց է ճանապարհորդութիւնը նախապէս ծրագրաւորելու, ինչպէս նաեւ ճամբորդութեան ժամանակ օգտագործելու համար», – ըսաւ  Սմիթսոնեան հիմնարկի «Իմ Հայաստան» ծրագիրի ներկայացուցիչ Սայմոն Ճոնսը:

«Ինչպէս ստեղծել ուղեցոյց» խորագիրով հանդիպման ընթացքին դոկտոր Երուանդ Զօրեան, Սայմոն Ճոնսը եւ գիտնական-փորձագէտներ Սաբրինա Փափազեան եւ  Յարութիւն Մարութեան ներկայացուցին «Վայոց ձոր» ուղեցոյցի մշակման աշխատանքի մանրամասները:

Այս ամսուան սկիզբը «Վայոց ձոր» եւ Հայաստանի մասին ՀՎՀ-ի երկու այլ ելեկտրոնային գիրքերը` «Հայկական լեռնաշխարհ» եւ «Բացայայտենք Երեւանը», ցուցադրուեցան Պոսթընի, Նիւ Եորքի եւ Ուաշընկթընի մէջ տեղի ունեցած ձեռնարկներու ընթացքին, որոնց նպատակն էր նպաստել Հայաստանի մէջ զբօսաշրջութեան, ներառեալ` մշակութային զբօսաշրջութեան, զարգացման:

Ել. գիրքերը  կարելի է  անվճար ներբեռնել կամ դիտել ` այցելելով www.avc-agbu.org կայքէջ:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին