Շաբաթ, 13. 07. 2024

spot_img

Ամերիկեան Բարքեր

*ԳԷՈՐԳ ՔԷՕՇԿԷՐԵԱՆ*
«Զարթօնք»ի Երէց Աշխատակից

Գործի Երթալու Նորագոյն Ձեւը…

Գաղտնիք մը չէ, որ Նիւ Եորք քաղաքը ապրիլը գրեթէ անհնարին է, սղութեան պատճառաւ։ Ուրեմն Նիւ Եորք աշխատող պաշտօնեաներուն եւ գործաւորներուն մեծամասնութիւնը կը բնակին Նիւ Ճըրզի, որովհետեւ հոն տուներու գիներն ու վարձքերը աւելի նպաստաւոր են։ Իսկ Նիւ Եորքը Նիւ Ճըրզիէն կը բաժնէ Հատսըն գետը։

Գիտենք որ Նիւ Ճըրզիէն-Նիւ Եորք երթեւեկը շատ հեշտ է։ Մարդիկ կամ անձնական ինքնաշարժերով եւ կամ ալ հանրային փոխադրամիջոցով կ’ընեն այդ ճամբորդութիւնը։ Իսկ փոխադրութեան երկու ձեւ կայ, կամ Ճորճ Ուաշինկթըն կամուրջով եւ կամ ալ ստորերկրեայ Լինքըն փապուղիով։

Մեր պատմութեան հերոսը՝ Սքաթ Հօլթ, կը բնակի Ճըրզի Սիթի եւ կ’աշխատի Նիւ Եորք։ Առաւօտ մը, ան կ’որոշէ գործի երթալ մակոյկով՝ (տես նկարը) չես գիտեր ինչու։ Հատսըն գետի լայնքն է 1.450 մեթր եւ թիավարելով՝ Սքաթ կէս ժամէն կը կտրէ գետը եւ կը հասնի իր գործատեղը, ուր կարեւոր ժողով մը կը գումարուէր։

Մեր յաջորդ նկարը ցոյց կու տայ զբօսաշրջիկներու խումբ մը, որոնք նաւով Նիւ Եորքի տեսարժան վայրերը շրջաքայելու ընթացքին, կը տեսնեն Սքաթը՝ մակոյկով դիավարելու ընթացքին։ Իսկ Սքաթ՝ անփոյթ շուրջի անցուդարձերէն, կը շարունակէ իր առաքելութիւնը։

Թէեւ Սքաթ անվնաս եւ ապահով կը հասնի իր տեղը, սակայն կը խոստովանի որ ահ ու սարսափի վայրկեաններ անցուցած է՝ իր անսովոր ճամբորդութեան ընթացքին։ Բայց ի՜ զարմանս բոլորին, անոր հագուստները երբեք չեն թրջած գետի ջուրէն, ի բացառեալ կօշիկներէն…

Բայց ինչո՞ւ այս սխրագործութիւնը, երբ շատ դիւրաւ ան կրնար գործի երթալ մեծամասնութեան ընտրած փոխադրամիջոցով։ Այս հարցին պատասխանը միայն ինք կրնայ տալ եւ մեզի կը մնայ հաղորդել այս լուրը եւ վերջ։

Իրականութի՞ւն, Թէ Առասպել…

Գանատայի մէջ գոյութիւն ունի Մորմոններէն ճիւղաւորուած աղանդ մը, որ կ’արտօնէ բազմակնութիւնը։ Այդ աղանդի հետեւորդները բնակութիւն հաստատած են Գանատայի Պրիթիշ Քոլոմպիա նահանգի Պաունթիֆուլ շրջանը։

Վերոյիշեալ աղանդի կրօնական մեծաւորներէն (Bishops) երկու անձեր՝ 61 տարեկան Ուինսթըն Պլէքվուտ (տես նկարը) եւ 54 տարեկան Ճէյմս Օլըր, վերջերս ամբաստանուած եւ դատապարտուած են բազմակնութեամբ։

Հիմա պիտի չհաւատաք, երբ ըսեմ, թէ Ուինսթըն Պլէքվուտ 24 կին ունի եւ 149 զաւակ, իսկ Ճէյմս Օլըր՝ 5 կին ունի եւ 11 զաւակ… Այսինքն՝ անոնք միասնաբար ունին 29 կին ու 160 զաւակ:

Պլէքվուտ ամուսնութեանց իր շարքը սկսած է 1975 թուականին եւ ամուսնութեան ժամանակ, իր կիներէն տասը՝ 17 տարեկան էին, երեքը՝ 16 տարեկան  եւ մէկը՝ 15 տարեկան։ Ան իր ամուսնութիւնները կ’որակէ «երկնային միութիւններ», այսինքն՝ «celestial unions»:

Գալով Օլըրի, որուն ամուսնութիւններն ալ «երկնային միութիւններ» կ’որակէ ան, ամուսնութեան ժամանակ կիներէն մին 15 տարեկան էր, իսկ ուրիշ մը՝ հազիւ 17 տարիքը թեւակոխած։

Ինքզինք արդարացնելու համար, Պլէքվուտ յայտարարած է, թէ ինք պարզապէս կը հետեւի իր կրօնքին թելադրութեանց եւ կ’ապրի այն կեանքը, որ իր կրօնքը կ’արտօնէ։ Ինչ մեղքս պահեմ, նայելով նկարին՝ միտքս կու գայ Դանիէլ Վարուժանի «Հացին Երգը» գիրքէն «Սերմանողն է։ Յաղթահասակ կը կանգնի մայրամուտի շողերուն մէջ ոսկեթոյր» քերթուածը:

Իսկ ի՞նչ է ասոնց դատավճիռը։ Շատ պիտի զարմանաք երբ ըսեմ թէ գրեթէ ոչինչ։ Արդարեւ, Պլէքվուտի պատիժն է վեց ամիս տնային կալանք եւ 150 ժամ ընկերային ծառայութիւն (community work), իսկ Օլըրի պատիժը՝ երեք ամիս տնային կալանք եւ 75 ժամ ընկերային ծառայութիւն։

Դժբախտաբար վերոյիշեալ յօդուածը երբեք չանդրադառնար, թէ այս երկու մարդիկը ի՞նչպէս կը հոգան իրենց ընտանիքներուն ապրուստը։ Հաւանաբար իրենց եկեղեցին է, որ կը հոգայ այդ ծախսերը, քանի որ այդ եկեղեցիին ընտրեալ մեծաւորներն են, չէ՞ք խորհիր…   

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին