Շաբաթ, 20. 07. 2024

spot_img

ՀԲԸՄ Պօղոս Գ. Կարմիրեան Վարժարանի Մանկապարտէզի Ամավերջի Հանդէս

       *ՍՈՆԻԱ ՏԵՅԻՐՄԵՆՃԵԱՆ*

2017-2018 կրթական տարեշրջանը աւարտած էր ՀԲԸՄ-ի Պօղոս Գ. Կարմիրեան վարժարանի մանկապարտէզի բաժնին համար եւ Կիրակի, 17 Յունիս 2018-ի պայծառ առաւօտուն վարժարանիս սրահը կը շտապէին ծնողներ, ազգականներ ու բարեկամներ՝ ներկայ գտնուելու մանկապարտէզի վկայականաց բաշխման հանդիսութեան, որ կը վայելէր հովանաւորութիւնը ՀԲԸՄ-ի Լիբանանի կրթական յանձնախումբին:

          Լիբանանի, Հայաստանի եւ ՀԲԸՄ-ի քայլերգերու յաջորդական ունկնդրութենէն ետք բեմին վարագոյրը մեղմիկ բացուեցաւ ու  Բողբոջ – Կոկոն – Ծաղիկ դասարանցիներէ կազմուած երգչախումբը ներկայացուց եռալեզու երգերու փունջ մը՝ «Դպրոցի Ճամբան», «Դասարանս», «Ողջոյնի Երգ», «Ուսուցիչս», «Ձօն Գրքին» եւ այլն:

          Բուռն ծափահարութիւններու ալիքէն ետք խօսք առաւ մանկապարտիզպանուհի Օրդ. Սոնիա Տեյիրմենճեանը, որ հաղորդեց անցնող տարեշրջանի իրագործումները, ապա անդրադարձաւ ՀԲԸ Միութեան Լիբանանի վարժարաններու առաքելութեան, կրթական ծրագիրներու եւ նորարարութիւններու մասին:  Աւարտին շնորհաւորեց շրջանաւարտները ու հրաւիրեց ներկաները վայելելու փոքրիկներուն զանազան ելոյթները:

          Յայտագիրը շարունակեց իր բնականոն ընթացքը եւ քանի որ հանդէսին խորագիրը «Ձօն Դպրոցին» էր, Ծաղիկ դասարանէն երեք աշակերտներ զրուցեցին դպրոցական վերամուտի մասին: Քիչ անց բեմահարթակը վերածուեցաւ դասարանի ու Ծաղիկ դասարանցիները ներկայացուցին արաբերէնի դասապահը, ուր ուսուցչուհին երգ մը սորվեցնելէ ետք արտօնեց, որ երեխաները ընթերցեն կամ ներկեն մինչեւ զբօսանքի զանգը:

          Զբօսանքէն ետք Ծաղիկները փայտէ ձողիկներով եւ դափերով հրամցուցին արաբական սիրուն պար մը,  ապա արտասանեցին «Դպրոցս» ոտանաւորը՝ արաբերէն լեզուով:

         

          Տեսերիզներու միջոցաւ, հանդիսատեսները հերթաբար դիտեցին Բողբոջ – Կոկոն – Ծաղիկ դասարաններու տարբեր միջոցառումները, որոնցմէ ետք Բողբոջները հանդէս եկան  հայկական խանդավառ պարով ու արտասանեցին «Մանկապարտէզս» եւ «Հայոց Լեզու» արտասանութիւնները:

          Կոկոնները մատուցեցին ամերիկեան աշխոյժ պար մը ու արտասանեցին «Բարի Գալուստ Մեր Դասարան» անգլերէն լեզուով եւ «Ուսուցչուհիս» հայերէն լեզուով:

          Ծաղիկները «Հայաստան, Արցախ ու Սփիւռք» գեղեցիկ պարով ներկաներուն փոխանցեցին հայրենասիրութեան եւ միասնականութեան պատգամը, ապա արտասանեցին «Աւարտական Օրը» անգլերէն լեզուով ու «Մայրենի Լեզու» հայերէն լեզուով:

          Վկայականներու բաշխումէն առաջ բեմ բարձրացաւ ՀԲԸՄ-ի Պօղոս Գ. Կարմիրեան վարժարանի տնօրէնուհի Տիկ. Մարալ Պալեօզեանը, որ նախ խօսեցաւ չորս տասնամեակներ եւ աւելին բոլորած Կարմիրեան վարժարանի վերջին տարիներու գործունէութեան ու նուաճումներուն մասին, ապա նշեց, թէ սոյն վարժարանը յառաջիկայ տարի պիտի ընդգրկէ ՀԲԸ Միութեան երեք վարժարաններու աշակերտութիւնը վերանորոգուած եւ արդիականացուած վիճակի մէջ ու նորանոր բաժիններով:  Տիկ. Պալեօզեան աւելցուց, թէ 2018-2019 տարեշրջանին I-pad I-learn ծրագիրը պիտի ուսուցանուի Ա. եւ Բ. դասարաններուն մէջ, իսկ գալիք տարիներուն՝ յաջորդաբար մնացեալ կարգերուն մէջ:  Տիկ. Պալեօզեան ըսաւ. «Մենք կ’ընթանանք լաւատեսութեամբ միաւորուելով այս կառոյցէն ներս նոր թափով եւ գօտեպնդուած աշխատանքով ու մեծ կազմով եւ կը  հաւատանք մեր յաջողութեան յառաջխաղացին Ա. դասարանի հետ մեր ձեռք ձգած փորձառութենէն»:  Հուսկ, շնորհակալութիւն յայտնեց փոփոխութիւններ, բարելաւումներ եւ նորութիւններ գնահատող լաւատես ու ընդունակ անհատներուն իրենց անվերապահ քաջալերանքին համար եւ եզրափակեց. «Մէկտեղուելով պիտի միանանք, միանալով պիտի զօրանանք ու շատանանք»:  

          Վերտիի աւանդական դարձած երաժշտութեան հնչիւններով սրահ մուտք գործեցին աւարտականները, որոնցմէ Ալեքսիա Արթինը համարձակօրէն արտասանեց հայերէն ուղերձը՝ արժանանալով ներկաներուն ջերմ ծափողջոյններուն:     

          Վկայականներու տուչութիւնը կատարուեցաւ ձեռամբ ՀԲԸՄ-ի Լիբանանի շրջանակային յանձնաժողովի ներկայացուցիչ Տիկ. Արտա Եանըքեանի, ՀԲԸՄ-ի Լիբանանի կրթական յանձնախումբի ներկայացուցիչ Տիկ. Սինթիա Մենտիլեանի, ՀԲԸ Միութեան վարժարաններու ընդհանուր տնօրէն Պրն. Արա Վասիլեանի, ՀԲԸՄ-ի Պօղոս Գ. Կարմիրեան վարժարանի տնօրէնուհի Տիկ. Մարալ Պալեօզեանի ու մանկապարտիզպանուհի Օրդ. Սոնիա Տեյիրմենճեանի:

          Փակման պարին մասնակցեցան մանկապարտէզի բոլոր աշակերտները, որոնք ինքնավստահ եւ հաստատ քայլերով հեռացան սրահէն:

          Այս բացառիկ հանդիսութեան աւարտին, յիշատակի նկարներ առնուեցան, գովասանքի ու շնորհաւորական խօսքեր փոխանցուեցան տնօրէնութեան եւ ուսուցչակազմին:  Բոլորը ուրախ էին ու գոհունակ:

          Բարի երթ եւ փայլուն ապագայ մեր սիրասուն մանուկներուն:

          Վարձքը կատար բոլորին:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին