Հայաստանի Հանրապետութեան ազգային անվտանգութեան ծառայութեան ստացած տուեալներուն հիման վրայ, Յուլիս 2-ին, իւրացումներ կատարելու, ինչպէս նաեւ հասարակական կազմակերպութեան ծառայողի կողմէ լիազօրութիւնները չարաշահելու կասկածանքով բռնուած է «Հայաստան» համահայկական հիմնադրամի տնօրէն Արա Վարդանեանը:
ՀՀ ԱԱԾ մամուլի կեդրոնին փոխանցած տեղեկութիւններով՝ փաստական հանգամանքներու ճնշման ներքոյ Վարդանեանը խոստովանած է, որ տնօրինելով հիմնադրամին տրամադրուած 25 միլիոն դրամի վարկային գծով դրամատնային քարտը, անոր միջոցները օգտագործած է անձնական նպատակներով, ներառեալ, զանոնք ուղղելով տարբեր առցանց խաղատուներու մէջ խաղադրոյքներ կատարելուն:
Ըստ իր խօսքերուն, վարկային քարտէն վատնած միջոցները Վարդանեանը ետ դարձուցած է հիմնադրամին հանգանակուած գումարներու հաշուին: Այնուհետեւ՝ անձնական միջոցները կանխիկ մուտքագրած է հիմնադրամի հաշուապահութիւն, ատով իսկ թաքցնելով հիմնադրամի գումարներուն վատնման հանգամանքը:
Միայն վերջին շաբթուան ընթացքին Վարդանեանը հիմնադրամի դրամատնային քարտէն մօտ 14 միլիոն ՀՀ դրամ փոխանցած է առցանց խաղատուներուն, իսկ 2016–2018 թուականները ինկած ժամանակահատուածին՝ այդ գումարը կազմած է շուրջ 130 000 000 միլիոն ՀՀ դրամ:
Այժմ «Հայաստան» համահայկական հիմնադրամին մէջ կը կատարուին ստուգումներ՝ հնարաւոր չարաշահումներն ու իւրացումները բացայայտելու, ինչպէս նաեւ հանգանակուած գումարներու ծախսման օրինականութիւնը ճշտելու ուղղութեամբ:
Արա Վարդանեանը ձերբակալուած է: Նախաքննութիւնը կը շարունակուի:
Ծանուցում. ենթադրեալ յանցանքի մէջ կասկածուողը կամ մեղադրուողը կը համարուի անմեղ, քանի դեռ անոր մեղաւորութիւնը ապացուցուած չէ ՀՀ քրէական դատավարութեան օրէնսգիրքով սահմանուած կարգով` դատարանի` օրինական ուժի մէջ մտած դատավճիռով:
