ՀՀ վարչապետ Նիկոլ Փաշինեան ընդունած է Երեւանի մէջ տեղի ունեցող ԱՊՀ կաշառակերութեան հակազդման միջպետական խորհուրդի նիստին մասնակից պատուիրակութիւններու ղեկավարները՝ ԱՊՀ գործադիր կոմիտէի նախագահի տեղակալ Ակիպայ Սմակուլովին, Պելառուսիոյ գլխաւոր դատախազ Ալեքսանտր Քոնիւլին, Ղրղզստանի գլխաւոր դատախազ Օթքուրպեք Ճամշիթովին, ՌԴ գլխաւոր դատախազի տեղակալ Վլատիմիր Մալինովսքին, ԱՊՀ անդամ պետութիւններու գլխաւոր դատախազներու համադասիչ խորհուրդի գործադիր քարտուղար Լէոնիտ Երմոլաեւին եւ Ղազախստանի պետական ծառայութեան եւ կաշառակերութեան հակազդման գործերով գործակալութեան նախագահ Ալիք Շփեքպաեւին: Այս մասին, ինչպէս կը փոխանցէ «Արմէնփրես»-ը, կը տեղեկացնեն ՀՀ կառավարութեան տեղեկատուութեան եւ հասարակայնութեան հետ կապերու վարչութենէն:
Վարչապետը ողջունած է հիւրերուն եւ կարեւորած Հայաստանի եւ ԱՊՀ երկիրներու դատախազութիւններու փոխգործակցութեան զարգացումը, իրաւական փոխօգնութեան ոլորտին մէջ գործակցութեան համակարգերու բարելաւումը: Նիկոլ Փաշինեան նշած է, որ ՀՀ կառավարութիւնը վճռական պայքար կը մղէ կաշառակերութեան դէմ, ինչ որ հաստատապէս շարունակական բնոյթ պիտի կրէ՝ երկրի հետագայ զարգացման թափը խթանելու նպատակով: Գործադիրի ղեկավարը յոյս յայտնած է, որ ԱՊՀ երկիրներու դատախազութիւններուն միջեւ կ’ընդլայնուի փոխգործակցութիւնը, ինչը կը նպաստէ կաշառակերութեան դէմ պայքարի արդիւնաւէտութեան բարձրացման, օրինականութեան, մարդու իրաւունքներու պաշտպանութեան ամրապնդման:
Հանդիպումին մասնակիցները անդրադարձած են համագործակցութեան խորացման հեռանկարներուն, ԱՊՀ կաշառակերութեան հակազդման միջպետական խորհուրդի ներուժը աւելի նպատակային օգտագործելու հնարաւորութիւններուն եւ ուղղութիւններուն: Կարեւորուած է յատկապէս անդրազգային յանցաւորութեան դէմ հասցէական պայքար մղելու համար գործարար տեղեկութեան եւ փորձի փոխանակումը:
Կողմերը կարեւորած են ԱՊՀ երկիրներու դատախազութիւններու միջեւ առկայ փոխվստահութեան ամրապնդումը եւ համոզում յայտնած, որ համատեղ ջանքերով կարելի կ’ըլլայ նուազագոյնի հասցնել կաշառակերութիւնն ու անկէ ածանցուող այլ արատաւոր երեւոյթները:
