Յունիս 21-ին մեկնարկած է Մարտակերտի ազատագրման 25-ամեակին նուիրուած տօնակական ձեռնարկներու շարքը, որ պիտի շարունակուի մինչեւ Յունիս 28: Այս մասին, ըստ «Artsakhpress.am»-ի, յայտնած են Մարտակերտի շրջանի «Ջրաբերդ» պաշտօնաթերթէն:
Յունիս 21-23 տեղի պիտի ունենայ «Շոտոկան» քարաթէի ՀՀ առաջնութիւն, Յունիս 25-ին՝ ժամը 14:00-ին՝ զարգացման խաղ՝ Մարտակերտի մշակոյթի եւ երիտասարդութեան կեդրոնէն ներս, Յունիս 25-ին՝ ժամը 18:00-ին Մարտակերտի մշակոյթի եւ երիտասարդութեան կեդրոնէն ներս պիտի կայանայ համերգ՝ Արցախի պետական էսթրատային խումբի մասնակցութեամբ: Յունիս 26-ին՝ ժամը 18:00-ին, Մարտակերտի մշակոյթի եւ երիտասարդութեան կեդրոնէն ներս պիտի բեմադրուի «Աշխարհը Լոռուայ ձորերում» ներկայացումը՝ Ստեփանակերտի Վահրամ Փափազեանի անուան պետական դրամատիկական թատրոնին մասնակցութեամբ, Յունիս 27-ին՝ ժամը 17:00-ին, Մարտակերտի մշակոյթի եւ երիտասարդութեան կեդրոնէն ներս տեղի պիտի ունենայ տօնական համերգ՝ կեդրոնի երգիչ-երգչուհիներուն կատարումով:
Ըստ աղբիւրին՝ Յունիս 27-28 Մարտակերտի Վիգէն Շիրինեանի անուան մարզադաշտին մէջ պիտի կազմակերպուի փոքր ֆութպոլի շրջանային առաջնութիւն, իսկ Յունիս 26-28՝ ժամը 10:00-17:00 ժամանակահատուածին, Մարտակերտի ըմբշամարտի դահլիճին մէջ՝ ազատ ոճի ըմբշամարտի մրցոյթ:
Տօնական շաբթուան վերջին օրը՝ Յունիս 28-ին՝ ժամը 10:00-ին, Մարտակերտի մէջ պիտի կազմակերպուի զինուորական քայլերթ, որուն պիտի յաջորդէ ծաղկեպսակադրութիւն՝ արցախեան գոյամարտին նահատակուած ազատամարտիկներու եւ զինծառայողներու յիշատակը յաւերժացնող յուշարձանին:
Կազմակերպուող ձեռնարկներուն ծիրէն ներս, նոյն օրը՝ ժամը 11:40-ին, շրջկեդրոնի մշակոյթի եւ երիտասարդութեան կեդրոնին մէջ պիտի կայանայ հանդիսաւոր ժողով՝ նուիրուած Մարտակերտի ազատագրման 25-րդ տարեդարձին, որուն պիտի յաջորդեն տօնական համերգներ:
Ժամը 22:00-ին տեղի պիտի ունենայ հրավառութիւն:
