Ղարաբաղա-ազրպէյճանական շփման գիծին վրայ իրավիճակը հանգիստ է՝ չնայած Արցախի մէջ ընթացող գործընթացներուն: Ազգային ժողովին լրագրողներու հետ զրոյցի ժամանակ այս մասին ըսաւ ՀՀ պաշտպանութեան նախարարի տեղակալ Մակար Ղամբարեանը: «Շփման գիծին վրայ իրավիճակը հանգիստ է, անհանգստանալու որեւէ պատճառ յայտնի չէ ինծի»,- «Արմէնփրես»-ի փոխանցումով ըսաւ փոխնախարարը:
Հարցին, թէ որպէս պաշտպանութեան փոխնախարար ի՛նչ պիտի ըլլայ իր գործունէութեան առաջնահերթութիւնը, Մակար Ղամբարեանը պատասխանեց. «Ֆինանսական կարգապահութեան մասով լրացուցիչ սարքաւորումներու ներդրումը»:
Անդրադառնալով հարցին, թէ ի՛նչ նկատի ունի լրացուցիչ սարքաւորումներու ներդրում ըսելով՝ փոխնախարարը ընդգծեց, որ անիկա աւելի շատ մասնագիտական քննարկումներու թեմա է եւ չի ցանկար նման ձեւաչափով անդրադառնալ այդ հարցին:
Ան ընդգծեց, որ ֆինանսական հոսքերու հետ կապուած ուսումնասիրութիւններ կ’իրականացնեն: «Նախկին հոսքերը կը նայինք, իսկ եթէ բարելաւումի կամ յաւելման անհրաժեշտութիւն զգացուի որոշ պարագաներու, անպայման կ’աշխատինք այդ ուղղութեամբ»,- ըսաւ ան:
