Յունիս 1-ին Հայաստանի ԱԳ նախարար Զօհրապ Մնացականեան ընդունեց Լրագրողներու համահայկական 9-րդ համաժողովի` 14 պետութիւններէ ժամանած մասնակիցները:
Ողջունելով սփիւռքահայ լրագրողները` նախարար Մնացականեան ընդգծեց, որ արտերկրի հայ լրատուամիջոցները մեծ ներդրում ունին Հայրենիք-Սփիւռք կապերու ապրապնդման գործին մէջ: Նախարարը շեշտեց նման ձեւաչափով հանդիպումներու կարեւորութիւնը, որոնք լաւ հնարաւորութիւն կ’ընձեռեն արտերկիր բնակող հայրենակիցներուն Հայաստանի արտաքին քաղաքականութեան մասին տեղեկացնելու առումով:
ԱԳՆ ղեկավարը լրագրողներուն ներկայացուց Հայաստանի արտաքին քաղաքականութեան առաջնահերթութիւնները` նշելով միջազգային օրակարգի խնդիրներու վերաբերեալ Հայաստանի մօտեցումները, մանրամասն անդրադարձ կատարեց ղարաբաղեան հիմնախնդիրի կարգաւորման գործընթացին, ներքաղաքական վերջին զարգացումներուն:
Զօհրապ Մնացականեան պատասխանեց լրագրողներու բազմաթիւ հարցերուն, որոնք կը վերաբերէին նոր պայմաններու մէջ Հայաստանի կողմէ վարուող արտաքին քաղաքականութեան:
