Հայաստանի Հանրապետութենէն դուրս գտնուող զինակոչիկներուն ուղղուած վարչապետ Նիկոլ Փաշինեանի կոչին՝ վերադառնալու հայրենիք եւ մեկնելու զինծառայութեան, արդէն իսկ արձագանգողներ կան: Այդ մասին, այսօրուան կառավարութեան նիստէն ետք, լրագրողներու հետ զրոյցի մը ընթացքին նշեց ՀՀ պաշտպանութեան նախարար Դաւիթ Տոնոյեան, կը հաղորդէ Armenpress.am-ը։
«Այո՛, ունինք դիմումներ արտերկիր գտնուող մեր հայրենակիցներէն, բայց գործերը դիտարկուած են անհատական։ Նաեւ վարչապետը յանձնարարական տուած է, որ հետախուզման մէջ գտնուող քաղաքացիներու պարագային, որոնք ցանկութիւն կը յայտնեն ծառայելու մեր Զինուած ուժերուն մէջ, դիւրացուած ձեւով հետախուզումը աւարտի եւ անոնք զինակոչուին»,- ըսաւ նախարարը:
Անդրադառնալով Ապրիլ 23-ին ներքաղաքական լարուածութեան ժամանակ ցոյցերուն միացած ԶՈւ խաղաղապահ բաժանմունքի զինծառայողներու ճակատագիրին՝ նախարարը նշեց, որ որոշումները պիտի կայացուին ծառայողական քննութեան արդիւնքներուն հիման վրայ։ Պաշտպանութեան նախարարութիւնը նախկին նախարար Վիգէն Սարգսեանի պաշտօնավարման ժամանակ յայտարարած էր, որ «խստօրէն կը դատապարտէ ՀՀ զինուած ուժերու խաղաղապահ բաժանմունքի խումբ մը զինծառայողներու մասնակցութիւնը Երեւանի մէջ օրէնքով սահմանուած կարգի խախտումով կազմակերպուած հաւաքին»:
