Պաշտօնական այցով Վրաստան գտնուող ՀՀ վարչապետ Նիկոլ Փաշինեան երէկ հանդիպած է վրացի եւ հայ գործարարներու հետ:
Վարչապետը նախ աշխատանքային նախաճաշ ունեցած է վրացի խոշոր գործարարներու, ապա աշխատանքային ճաշ՝ այդ երկրին մէջ գործունէութիւն ծաւալող հայ գործարարներու հետ:
Կառավարութեան տեղեկատուութեան ու հասարակայնութեան հետ կապերու վարչութեան փոխանցած տեղեկութիւններով՝ ՀՀ վարչապետը անոնց ներկայացուցած է տնտեսութեան ոլորտին մէջ կառավարութեան առաջնահերթութիւնները, անդրադարձած հարկային, մաքսային վարչարարութեան պարզեցման, կաշառակերութեան դէմ պայքարին, եւ ընդհանուր առմամբ, գործարար միջավայրի բարելաւման միտուած քայլերուն, որոնք գործադիրը կը նախատեսէ կեանքի կոչել յառաջիկային:
Վարչապետ Փաշինեան կարեւոր համարած է հայ-վրացական գործարար կապերու շարունակական զարգացումը:
Ան ընդգծած է, որ ՀՀ կառավարութիւնը շահագրգռուած է երկու երկիրներուն միջեւ առեւտրաշրջանառութեան ծաւալներուն աճով, համատեղ ներդրումային ծրագիրներու իրականացումով եւ պատրաստ է ձեռնարկելու այնպիսի քայլերու, որոնք պիտի նպաստեն մեր երկրին մէջ վրացական դրամագլուխի ներկայացուածութեան ընդլայնման:
