ՀՀ նախագահ Արմէն Սարգսեան Մայիս 29-ին այցելեց Հայրենիքի պաշտպանի վերականգնողական կեդրոն՝ Առաջին հանրապետութեան հարիւրամեակին առիթով անձամբ շնորհաւորելու կեդրոնին մէջ բուժուող զինուորները: Ըստ «Armenpress.am»-ի՝ նախագահը կարեւոր համարեց կեդրոնին մէջ բուժում ստացող զինուորները արժանապատիւ կեանք վերադարձնելու անհրաժեշտութիւնը: «Մենք պետականօրէն պէտք է կազմակերպենք, որպէսզի հաշմանդամները վերադառնան արժանապատիւ կեանք եւ ո՛չ թէ իրենց ողջ կեանքը օգնութիւն ստանան: Օգնութիւն ակնկալելու հոգեբանութենէն պէտք է դուրս գալ»,- յորդորեց Արմէն Սարգսեան՝ աւելցնելով, որ իր առաջարկը պիտի քննարկէ նաեւ ՀՀ վարչապետի հետ:
«Այստեղ առողջութիւնը վերականգնած մարդը, որ նաեւ այս ընթացքին ապահոված է մասնագիտական որակներ, պէտք է առաւելութիւն ստանայ գործատուներու կողմէ: Ատիկա աշխարհի մէջ ընդունուած փորձ է: Պատկերացուցէք Հայաստանի մէջ աշխատող բազմաթիւ ընկերութիւններ երեք, չորս, հինգ հոգի աշխատանքի հրաւիրեն եւ ճիշդ աշխատավարձ տան: Այս մարդիկ իրենց աշխատանքով պիտի ապրին, այլ ո՛չ թէ օգնութիւն պիտի ստանան»,- նշեց նախագահը:
Արմէն Սարգսեան ընդգծեց, որ տղոց խնդիրները առողջութեան վերականգնումով չեն աւարտիր: «Անոնցմէ շատերը ընկերային խնդիրներ ունին, իրենց կեանքը վտանգի տակ դրած տղաները այսօր կը ստանան թոշակ, որով առողջ մարդը չի կրնար ապրիլ: Այս տղաներուն թոշակը պէտք է արժանի ըլլայ իրենց նուիրումին»,- ըսաւ Արմէն Սարգսեան:
Ան նշեց, որ բարի աշխատանքի ծաւալը պէտք է մեծնայ, եւ նման վերականգնողական կեդրոններ պէտք է գործեն նաեւ հեռաւոր շրջաններու մէջ: «Առողջապահական համակարգը պէտք է բազմապատկուի եւ Երեւանի կեդրոնէն շրջաններ երթայ: Վիրաւոր մարդոց Հայաստանի հիւսիսէն, հարաւէն, Ղարաբաղէն այստեղ բերելը շատ դժուար է»,- ըսաւ Արմէն Սարգսեան:
