Պէյրութի «Զարթօնք» օրաթերթի գլխաւոր խմբագիր Սեւակ Յակոբեան բարձր կը գնահատէ Հայաստանի ներքաղաքական վերջին զարգացումներու առարկայական լուսաբանումը սփիւռքի հայկական լրատուամիջոցներուն կողմէ:
«Արմէնփրես»–ի հաղորդմամբ՝ Յակոբեան նման կարծիք յայտնեց Հայաստանի մէջ տեղի ունեցող Լրատուամիջոցներու 9-րդ համաժողովին լրագրողներու հետ զրոյցի ժամանակ:
«Պէյրութի եւ առհասարակ սփիւռքի հայկական լրատուամիջոցները լուսաբանեցին Հայաստանի վերջին իրադարձութիւնները՝ մտահոգ եւ հետաքրքրուած: Ամէն ինչ առարկայական ներկայացուեցաւ: «Զարթօնք»-ը «Արմէնփրես» լրատուական գործակալութեան գործընկերն է: Եւ, հետեւաբար, այդ օրերու լուրերուն համար եւս կ’օգտուէինք «Արմէնփրես»-էն: Առարկայական լուսաբանումը սփիւռքի մէջ շատ կարեւոր էր, քանի որ սփիւռքը կ’ապրի հայրենիքով, հայրենիքի իրադարձութիւններով»,- ըսաւ Յակոբեան ու աւելցուց, թէ շատ կարեւոր էր, որ սփիւռքի մէջ լուսաբանումը ըլլար ճիշդ աղբիւրէ:
Իր կարծիքով՝ ֆէյսպուք ընկերային ցանցը մարդոց իրազեկելու առումով եւս մեծ դեր ունեցաւ, սակայն աւելի կարեւոր էր առարկայական լուսաբանումը:
«Մեզի համար ուրախութիւն էր, որ ներքաղաքական զարգացումները աւարտեցան հայ ժողովուրդին վայել կերպով, այսինքն՝ առանց արիւնահեղութեան: Անոր համար պարտական ենք երկու կողմին՝ թէ՛ նախկին եւ թէ՛ ներկայ իշխանութեան: Սփիւռքի համար ամենակարեւորը հայրենիքի կայունութիւնն է»,- եզրափակեց «Զարթօնք»-ի գլխաւոր խմբագիրը:
