Կիրակի, 21. 07. 2024

spot_img

Դար Մը Նուիրեալ Ծառայութիւն

*ԺԱՆԻՆ ԴԱՆԻԷԼԵԱՆ-ՄԱՐԳԱՐԵԱՆ*

Հարիւրամեայ գործունէութիւն․․․ ամբողջ դար մը, նուիրեալ ծառայութեան, որ մեկնարկեց ստեղծագործող ներկայով մը, ի պատասխան համազգային աղէտի եւ անձնական ողբերգական կորուստի։

1918 թուականին Նիւ Եորքի մէջ Միհրան եւ Զապէլ Գարակէօզեաններ, մեկնելով մարդկային ազնուագոյն զգացումներէ եւ քրիստոնէական ապրումներէ, իրենց 14-ամեայ վաղամեռիկ որդիին՝ Հաուըրտին յիշատակը յաւերժացնելու նպատակով վճռեցին հաստատել մարդասիրական ծառայութիւն մը` փրկելու հարիւրաւոր հայ որբերու կեանքը, զոր անողոք դահիճներ փորձած էին մահուան դատապարտել՝ զանոնք յանձնելով անապատի եւ աւերակներու էջերուն։

Ցաւը ծնունդի վերածելով եւ ծառայութիւնը իր գոյութեան նպատակը դարձնելով՝  հարիւր տարիներ ետք, դիմանալով հայ կեանքը փոթորկող զանազան դժուարութիւններուն, Գարակէօզեան Հաստատութիւնը ո՛չ միայն շարունակեց պահել իր գոյութիւնը, այլեւ հետզհետէ  ուռճանալով դարձաւ աւելի առոյգ, կենսունակ եւ ծաւալուն: Իրականացուց լայնածաւալ օգնութեան ծրագիրներ ո՛չ միայն առօրեայի ժամանակաւոր նպաստաբաշխի բնոյթով պատահական աղէտ մը դարմանելու համար, այլեւ ապագայի շէնութեան, բարգաւաճման եւ գոյապահպանման ի խնդիր:  

Հարիւր տարիներ ետք, 14 ամեայ Հաուըրտ Գարակէօզեանի մահուան (26 Ապրիլ 1918) ճիշդ հարիւրամեակին առիթով, 26 Ապրիլ  2018-ին  նախախնամութեան գեղեցիկ դիպուածով, ծաղկազարդուեցաւ Լիբանանի Գարակէօզեան հաստատութիւնը, երբ կեդրոն այցելեցին Ազգային Միացեալ Վարժարանի նախակրթարանի չորրորդ, հինգերորդ եւ վեցերորդ դասարանի 160 աշակերտները, որոնց տարիքները կը տարուբերէին 12-էն 14-ի միջեւ, եւ ստացան Ֆիզիքական, աչքի եւ ակռաներու ընդհանուր բժշկական խնամք: Հաստատութեան տնօրէն Սերոբ Օհանեան, օգտուելով այս պատեհ առիթէն, փոքրիկն Հաուըրտի կեանքին ընդմէջէն ներկայ աշակերտներուն ներկայացուց Գարակէօզեան հաստատութեան պատմականը եւ խօսեցաւ տալու մաքրամաքուր  առաքինութեան մասին։

Լիբանանի Գարակէօզեան Հաստատութիւնը օժտուած կազմակերպչական եւ համագործակցական բացառիկ տուեալներով, ընդարձակեց  իր գործունէութիւնը  եւ մտաւ ծառայողական այլազան ոլորտներու մէջ` մատուցելով հետեւեալ ծառայութիւնները՝ միշտ խորհրդանշական սակերով։

Մանկաբուժական պատուաստներ, Ընտանեկան  բժշկութիւն (Family Medicine), Մասնագիտական բժշկութիւններ` կանանց, սրտի, շաքարի, գեղձերու եւ աչքի, Ատամնաբուժում, Դպրոցական Առողջապահութիւն, Սննդագիտութիւն, Դեղարան, Ընկերային Ծառայութիւն, Գործի հայթայթման գրասենեակ, Կանխարգիլման եւ դաստիարակչական արշաւներ, Ուսումնկան յատուկ կարիքներ ունեցող աշակերտներու Մանկավարժական Կեդրոն, Մտային առողջապահութիւն, Սերտարան, Ամառնային դպրոց։

Աւելին, Գարակէօզեան Հաստատութիւնը եղաւ ժողովուրդին հետ եւ ժողովուրդին համար․ լսեց եւ բաժնեկցեց առօրեայի անոնց  ցաւերը, տնտեսական ու ընկերային մտահոգութիւնները եւ երկարեց իր ամոքող ձեռքը անխտիր ամէնքին՝ վառ պահելով անոնց մէջ յոյսի ջահը եւ զգացնելով, որ իրենք եւս կարեւոր անդամներն են գործօն համայնքին։

Այսօր փոքրիկն Հաուըրտ Գարակէօզեանը «Գարակէօզեան Հաստատութեան» ծաւալուն գործունէութեան ընդմէջէն բոլորեց իր յիշատակի յաւերժացման հարիւրամեակը՝ Լիբանանի մէջ դառնալով հայութեան բաբախուն մայր երակներէն մին: Հաստատութիւնս գործեց եւ պիտի գործէ՝ միակ նպատակակէտ ունենալով առողջապահական կեանքի բարւոքում եւ ընկերային կեանքի բարեփոխում՝ միշտ դրական ոգիով ապրելու եւ նայելու ապագային։  

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին