Վերջնական Տարբերակները
ՀՀ կառավարութեան մէջ Մայիս 22-ին արտահերթ նիստ գումարուած է, զոր վարած է ՀՀ վարչապետ Նիկոլ Փաշինեան: Ինչպէս կը փոխանցէ «Արմէնփրես»-ը, այս մասին կը տեղեկացնեն ՀՀ կառավարութեան տեղեկատուութեան եւ հասարակայնութեան հետ կապերու վարչութենէն:
Նիստի ժամանակ քննարկուած է երկու հարց: Գործադիրը սահմանած է նախարարութիւններուն ենթակայ մարմիններու ենթակայութիւնը: ՀՀ սահմանադրութեան 159-րդ յօդուածին համաձայն՝ պետական կառավարման համակարգի մարմիններն են նախարարութիւնները, ինչպէս նաեւ ՀՀ կառավարութեան, ՀՀ վարչապետին եւ ՀՀ նախարարութիւններուն ենթակայ մարմինները: Հիմնաւորումին համաձայն՝ նախարարութեան ենթակայ մարմինը կը գործէ նախարարութեան վերապահուած գործունէութեան ոլորտի շրջանակին մէջ եւ կ’ապահովէ նախարարութեան իրաւասութեան վերապահուած գործունէութեան առանձին ուղղութիւններու իրականացումը:
ՀՀ առաջին փոխվարչապետ Արարատ Միրզոյեան առաջարկած է փոփոխութիւն կատարել նախագիծին մէջ, եւ Պետական գոյքի կառավարման կոմիտէն սահմանած է ՀՀ տնտեսական զարգացման եւ ներդրումներու նախարարութեան ենթակայ մարմին՝ ՀՀ ֆինանսներու նախարարութեան փոխարէն: Առաջարկը ընդունուած է:
Կառավարութիւնը սահմանած է նաեւ պետական կառավարման համակարգի մարմինի կանոնադրութեան օրինակելի ձեւը: Անոր համաձայն՝ սահմանուած են նախարարութեան, կառավարութեան, վարչապետին եւ նախարարութեան ենթակայ մարմինի կանոնադրութիւններու օրինակելի ձեւերը:
Վարչապետ Նիկոլ Փաշինեան յանձնարարած է կառավարութեան անդամներուն 10-օրեայ ժամկէտի մէջ ներկայացնել գերատեսչութիւններու կանոնադրութիւններու վերջնական տարբերակները:
