Այս տարի Հայաստանի մէջ Թանգարաններու գիշերը արդէն 15-րդ անգամ եւ 6-րդ անգամ Արցախի մէջ կը նշուի Մայիս 19-ին: Ձեռնարկը կ’իրականացուի Մայիս 18-ին նշուող Թանգարաններու միջազգային օրուան ամենամօտ շաբաթ օրը` Եւրոխորհուրդի, ԵՈՒՆԵՍՔՕ-ի եւ ԻԿՕՄ-ի հովանաւորութեամբ:
Թանգարաններու միջազգային օրը կը նշուի 1977 թուականէն` իւրաքանչիւր տարի Մայիս 18-ին համախմբելով աւելի քան 30 հազար թանգարաններ աշխարհի տարբեր երկիրներէ:
Ինչպէս «Հայերն այսօր»-ին կը յայտնեն ՀՀ մշակոյթի նախարարութենէն, այս տարի ձեռնարկին միացած են Հայաստանի եւ Արցախի 116 թանագարաններ:
2018 թուականին ԻԿՕՄ-ի կողմէ ընտրուած Թանգարաններու միջազգային օրուան խորագիրն է «Գերհաղորդակցուող թանգարաններ. նոր մօտեցումներ, նոր հանրոյթներ»: Միաժամանակ, երկօրեայ ձեռնարկներու ծրագիրին մէջ անդրադարձ պիտի ըլլայ նաեւ Առաջին հանրապետութեան 100-ամեակին:
Ձեռնարկներու ձեւաչափին համապատասխան` Մայիս 18-ին` ժամը 10:00-էն 18:00, իսկ Մայիս 19-ին` 18:00-էն 00:00, Հայաստանի եւ Արցախի 116 թանգարաններու դռները անվճար բաց կ’ըլլան հասարակութեան համար: Մայիս 19-ին Երեւանի Մեթրոպոլիթենը կ’աշխատի մինչեւ 01:00:
