Երեւանի ընդհանուր իրաւասութեան դատարանի Շենկավիթ նստավայրին մէջ դատաւոր Արշակ Վարդանեանի նախագահութեամբ Մայիս 11-ին կայացաւ առանձին վարոյթով քննուող ՊՊԾ (պարեկապահակային ծառայութեան) գունդի գրաւման գործով դատական նիստը: Ինչպէս կը փոխանցէ «Արմէնփրես»-ը, այս մասով կը քննուին մեղադրեալներ Արամ Մանուկեանի, Յովհաննէս Յարութիւնեանի, Թաթուլ Թամրազեանի, Արամ Յակոբեանի, Տիգրան Մանուկեանի, Արայիկ Յակոբեանի, Վարդան Գերաւէտեանի, Մարտիրոս Յակոբեանի, Սերկէյ Կիւրեղեանի, Գէորգ Իրիցեանի եւ Թորոս Թորոսեանի գործերը:
Պաշտպանները միջնորդութիւն ներկայացուցած էին իրենց պաշտպանեալներու խափանման միջոցը որպէս կալանք կիրառելը վերացնելու վերաբերեալ եւ որպէս խափանման միջոց կիրառել բնակավայրէն ստորագրութեամբ չհեռանալը: Անոնք կը նկատէին, որ իրենց պաշտպանեալները կալանաւորման մէջ պահելու համար չկայ որեւէ հիմք:
Խորհրդակցական սենեակէն վերադառնալէ ետք դատարանը որոշեց մերժել պաշտպաններու՝ իրենց պաշտպանեալներուն համար որպէս խափանման միջոց ընտրուած կալանքը վերացնելու եւ զայն գրաւով փոխելու կապակցութեամբ միջնորդութիւնները:
Միջնորդութիւն ներկայացուած էր նաեւ Արամ Յակոբեանի նկատմամբ յանձնաժողովային դատաբժշկական փորձաքննութիւն նշանակելու վերաբերեալ: Ինչպէս նշեց նախագահող դատաւորը, միջնորդութեամբ փորձ կը կատարուի պարզելու, թէ արդեօք մեղադրեալի մօտ հիւանդութիւնները կը դասուի՛ն կառավարութեան 2006 թուականի որոշումով յաւելուածին մէջ ընդգրկուած ծանր հիւանդութիւններու շարքին:
Դատարանը բաւարարեց միջնորդութիւնը եւ նշանակեց դատաբժշկական յանձնաժողովային փորձաքննութիւն, որուն կատարումը յանձնարարած է ԳԱԱ փորձաքննութիւններու ազգային պիւրոյ ՊՈԱԿ փորձագէտներուն:
