Հայաստանի Հանրապետութեան մէջ Միացեալ Նահանգներու դեսպանութիւնը իրաւասու չէ հաստատելու, ժխտելու կամ քննարկելու իրաւապահ քննութիւններու հետ կապուած տեղեկութիւններ: Այս մասին նշած են դեսպանութենէն՝ «Արմէնփրես»-ի խնդրանքով արձագանգելով ԶԼՄ-ներու որոշ հրապարակումներուն, ըստ որոնց՝ ԱՄՆ Հետաքննութիւններու դաշնային պիւրոյի (FBI) քննիչներու խումբը պիտի այցելէ Հայաստան:
«Մեր քաղաքականութենէն մեկնելով՝ մենք իրաւասու չենք հաստատելու, ժխտելու կամ քննարկելու իրաւապահ քննութիւններու հետ կապուած տեղեկութիւններ»,- ըսած են դեսպանութենէն:
Գործակալութիւնը խնդիրին մասին փորձած է տեղեկութիւններ ճշդել ՀՀ գլխաւոր դատախազութենէն: «Նշուած նպատակով՝ նման խումբի այցելութեան մասին տեղեկութիւն չունի ՀՀ դատախազութիւնը»,- յայտնած են դատախազութենէն:
Հայկական որոշ լրատուամիջոցներ օրերս տեղեկութիւն տարածած էին, թէ Հայաստան պիտի ժամանեն ԱՄՆ Հետաքննութիւններու դաշնային պիւրոյի (FBI) քննիչներու խումբ. «Խումբի անդամները Հայաստանէն ապօրինի դրամագումարի արտահոսքի ուսումնասիրութիւններ պիտի սկսին»:
