Արցախի Հանրապետութիւն աշխատանքային այցի ծիրին մէջ վարչապետ Նիկոլ Փաշինեանը հանդիպում ունեցած է Արցախի Հանրապետութեան նախագահ Բակօ Սահակեանի հետ:
Ինչպէս կը հաղորդէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ հանդիպումին ընթացքին քննարկուած են Հայաստանի եւ Արցախի միջեւ տարբեր ոլորտներուն մէջ փոխգործակցութեան վերաբերող շարք մը հարցեր:
«Մեծարգոյ Պարոն վարչապետ, ողջունում եմ Ձեզ, ինչպէս նաեւ Ձեր որոշումը՝ Հայաստանի Հանրապետութեան վարչապետ ընտրուելուց յետոյ առաջին այցելութիւնն Արցախ իրականացնելու համար: Կարեւորում եմ, որ այսօր Ձեզ հետ եղանք Պաշտպանութեան նախարարութիւնում, ինչպէս նաեւ հնարաւորութիւն ունեցանք խօսել մեր տնտեսութեան մասին: Համոզմունք յայտնեցինք, որ այսուհետ եւս մեր ջանքերն ուղղուելու են մեր հայրենիքի, ասել է թէ՝ Հայաստանի ու Արցախի հզօրացմանն ու շէնացմանը: Ողջունում եմ Ձեզ Ձեր հայրենիքի արցախեան հատուած այցելելու կապակցութեամբ»,- ըսած է Բակօ Սահակեանը:
«Շնորհակալ եմ Պարոն նախագահ, կարեւոր եմ համարում, որ իմ առաջին այցը վարչապետի կարգավիճակում կայանում է հենց Արցախի Հանրապետութիւն, որովհետեւ Արցախի Հանրապետութեան հետ մեր յարաբերութիւններն առաջնային են: Ես եկել եմ այստեղ հետեւեալ երկու ուղերձով. առաջինը, որ լիարժէք եւ անվերապահօրէն իմ աջակցութիւնն եմ յայտնում Արցախի Հանրապետութեանը եւ նրա նախագահին, երկրորդը՝ երէկ ես իմ ելոյթում ասել եմ, որ շատ կարեւոր ենք համարում ղարաբաղեան հիմնախնդրի բանակցային գործընթացի շարունակութիւնը, որը հաշուի կ’առնի Արցախի ժողովրդի ինքնորոշման իրաւունքը եւ յայտարարել եմ, որ պատրաստ եմ բանակցել Ազրպէյճանի նախագահի հետ ԵԱՀԿ Մինսքի խմբի համանախագահութեան շրջանակներում, բայց նաեւ կարծում եմ, որ բանակցային այդ ֆորմաթը լիարժէք համարուել չի կարող, քանի դեռ դրան չի մասնակցում հակամարտութեան լիարժէք կողմերից մէկը՝ Արցախի ղեկավարութիւնը: Կը համարձակուեմ պնդել, որ պատճառներից մէկը, որ հարցի կարգաւորման բանակցութիւնները մինչ այսօր ցանկալի արդիւնք չեն տալիս՝ թերեւս նաեւ դա է, որովհետեւ դժուար է պատկերացնել, որ ոչ լիարժէք, կիսատ ֆորմաթով որեւէ բանակցութիւն կարող է արդիւնք տալ: Մենք նաեւ կարծում ենք, որ պէտք է ջանքեր գործադրենք, այդ թուում՝ սփիւռքի ներուժն օգտագործելու ուղղութեամբ, որպէսզի Արցախի Հանրապետութեան միջազգային ճանաչումն ոչ միայն շարունակուի, այլ նաեւ նոր թափ ստանայ: Մենք հաւատարիմ ենք հարցի բացառապէս խաղաղ կարգաւորմանը եւ դատապարտում ենք ուժի կիրառման որեւէ գործողութիւն կամ սպառնալիք: Որեւէ կասկած չկայ, որ Հայաստանի կառավարութիւնը կը գործադրի բոլոր հնարաւոր ջանքերն Արցախի Հանրապետութեան եւ նրա ժողովրդի շահերը պաշտպանելու համար, այդ թուում՝ միջազգային ասպարէզում, բայց կարծում եմ, որ Արցախի Հանրապետութեան եւ ժողովրդի շահերը միջազգային ասպարէզում լաւագոյնս կը պաշտպանեն հենց Արցախի իշխանութիւնները: Ուստի մեր ջանքերը պէտք է ուղղուած լինեն նրան, որ Արցախի Հանրապետութիւնը եւ իշխանութիւնն օր առաջ միջազգայնօրէն ճանաչուի»,- նշած է Նիկոլ Փաշինեանը:
«Ես այս տարիների ընթացքում մէկ անգամ չէ, որ բարձրաձայնել եմ, որ մեր կեանքի դժուարութիւնները յաղթահարել ենք Մայր Հայաստանի եւ Սփիւռքի քոյրերի ու եղբայրների հետ միասին, ինչպէս նաեւ մեր բոլոր նուաճումներն արձանագրել ենք այդ նոյն եռամիասնութեան շնորհիւ: Այս այցելութիւնը եւ մեր բանակցութիւնները, քննարկուած հարցերն ու խնդիրները մէկ անգամ եւս ոչ միայն յոյս են ներշնչում, այլ բոլորիս համոզմունք են հաղորդում, որ այդ նոյն եռամիասնութեան շնորհիւ, այդ նոյն հաւատարմութեամբ, հաստատակամութեամբ, վճռականութեամբ իրականացնելու ենք մեր սրբազան առաքելութիւնը, այն է՝ մեր հայրենիքի պաշտպանութիւնը, անառիկ սահմանների պահպանումը եւ մեր ժողովրդի բարեկեցութեան աստիճանի բարձրացումը: Ես նաեւ հնարաւորութիւն եմ ունեցել Ձեզ հաղորդել տարբեր տեղեկութիւններ, յատկապէս այս պահի դրութեամբ մեր պետական սահմանների հատուածում ստեղծուած իրավիճակի մասին եւ Դուք համոզուել էք, որ Արցախի Հանրապետութեան զինուած ուժերը, Արցախի քաղաքացիներն ու համայն հայութիւնն ինչպիսի վճռականութեամբ են լցուած, եթէ մեր հակառակորդը նորից դիմի յանցաւոր գործողութիւնների: Բնականաբար, այս այցելութիւնը եւ մեր քննարկումներն էլ աւելի են յստակեցրել մեր հաւանական գործողութիւններն այդ յանցաւոր քայլերի պայմաններում»,- ըսած է Բակօ Սահակեանը:
«Պարոն նախագահ, շատ ուրախ եմ արձանագրել եւ համոզուել, որ Արցախի պաշտպանութեան բանակը վստահօրէն վերահսկում է իրավիճակն առաջնագծում, ինչպէս նախկինում՝ ԱՀ ՊԲ-ի մարտունակութիւնը բարձր է, բայց ես կարծում եմ, որ այդ աւանդական մարտունակութեանն աւելացել է եւս մի կոմպոնենտ՝ դա այն ազգային միասնութեան մթնոլորտն է, որ տեղի ունեցած վերջին իրադարձութիւններից յետոյ տիրում է Հայաստանում, Արցախում եւ Սփիւռքում: Կարծում եմ, որ սա կարեւոր ռազմաքաղաքական գործօն է եւ որեւէ կասկած չկայ, որ այսօր Հայաստանի Հանրապետութիւնը եւ Արցախի Հանրապետութիւնը, հայ ժողովուրդը ոչ միայն ի վիճակի է պաշտպանել իրեն, այլ նաեւ խորը զղջման հասցնել իւրաքանչիւր ուժի, որը կը յանդգնի ոտնձգութիւն կատարել նրա անվտանգութեան նկատմամբ:
Կրկին ցանկանում եմ շնորհակալութիւն յայտնել ջերմ ընդունելութեան եւ այն անկեղծ երկխօսութեան համար, որ հաստատուեց մեր միջեւ, չնայած այդ անկեղծ երկխօսութիւնն այսօր չէ, որ հաստատուել է, բայց վարչապետի կարգավիճակում ես առաջին անգամ եմ հիւրընկալուում Ձեզ եւ համոզուած եմ, որ մեր համագործակցութիւնը լինելու է արդիւնաւէտ, եւ այսօրուայ այցը դրա համար որեւէ կասկած չի թողնում: Շնորհակալութիւն»,- եզրափակած է ՀՀ վարչապետը:
