Շաբաթ, 13. 07. 2024

spot_img

Սուրբ Էջմիածնի Կրօնասէր Տիկնանց Համախմբումի 58-Ամեակի Տօնակատարութիւն

*ԱՀԱՐՈՆ ՇԽՐՏՄԵԱՆ*

Ահաւասիկ  կառոյց, որ  Լիբանանի ազգային, հոգեւոր երկնակամարին վրայ  հիմնադրութեան առաջին օրէն մինչեւ օրս  հաւատարիմ կը մնայ իր կոչումին եւ առաքելութեան: Ահաւասիկ կառոյց եւ համախմբում, որուն այսօրը  երաշխիքն է  Հայ եկեղեցւոյ՝ ի սպաս անոր  վաղուան  ծառայութիւններուն:

Համախմբումի երկարամեայ ծառայողներուն պարգեւատրութիւն

1959-ին  հիմնադրուած  Սուրբ Էջմիածնի  Կրօնասէր Տիկնանց Համախմբումը իւրաքանչիւր  տարի յատուկ հանրագումարի  կը բերէ   ընթացաւարտ տարուան  իր աշխատանքները, կ’արժեւորէ  իր երախտաւորները, նոր եռանդով եւ նոր կորովով  կը  շարունակէ դէպի նոր հորիզոններ իր գոյերթը:   

Գերաշնորհ Տէր Յովնան Եպս․ Յակոբեան, Մայր Աթոռ Սուրբ Էջմիածնի Լուսարարապե…

Ի ներկայութիւն Լիբանանի մէջ Հայաստանի արտակարգ եւ լիազօր դեսպան Սամուէլ Մկրտչեանի, Մայր Աթոռ Սուրբ Էջմիածնի Լուսարարապետ Գերաշնորհ Տէր Յովնան Եպիսկոպոս Յակոբեանի, Դամասկոսի Թեմի Բարեջան Առաջնորդ  Գերաշնորհ Տէր Արմաշ Եպիսկոպոս Նալպանտեանի, Մեծի Տանն Կիլիկիոյ Արժանապատիւ Տէր Պետրոս Վարդապետ Մանուէլեանի,  Մայր Աթոռ Սուրբ Էջմիածնի  Գէորգեան Հոգեւոր Ճեմարանի  տեսուչ Արժանապատիւ Տէր Գարեգին Վարդապետ Համբարձումեանի, մեծ թիւով անդամներու, ազգայիններու, բարեկամներու, Կիրակի, 29  Ապրիլ 2018-ի  կէսօրուան ժամը 12-ին,  ՀԲԸՄ-ի  Տեմիրճեան  կեդրոնին մէջ տեղի ունեցաւ Սուրբ Էջմիածնի Կրօնասէր Տիկնանց  Համախմբումի հիմնադրութեան  58- ամեակի  հանդիսութիւնը:

Տէր Գարեգին Վարդապետ Համբարձումեանը՝ Մայր Աթոռ Ս. Էջմիածնի Գէորգեան Հոգե…

Հանդիսասրահին  սեղանները կը կրէին   Հայաստանի եւ Սփիւռքի  պատմական   եկեղեցիներուն անունները իրենց հիասքանչ  նկարներով, իրենց հիմնադրութեան թուականով եւ գտնուած վայրով։ ՝

Մայր Աթոռ Սուրբ Էջմիածին – Սուրբ Գրիգոր Լուսաւորիչ Տաճար, 

303 – 1930, Էջմիածին – Լիբանան; ԶՈՒԱՐԹՆՈՑ  ՍՈՒՐԲ ԳՐԻԳՈՐ  ՏԱՃԱՐ, XII դ․ Արմաւիր; ՕՁՈՒՆԻ ՎԱՆՔ, IV դ., Լոռի; ՄՇՈՅ ՍՈՒՐԲ ԿԱՐԱՊԵՏ, IX–XIII դ․, Տարօն; ԽՈՐ ՎԻՐԱՊԻ  ՎԱՆՔ, 642 թ․, Արարատ; ԱՄԱՐԱՍԻ ՎԱՆՔ, IV դ., Արցախ; ՍՈՒՐԲ ԱՍՏՈՒԱԾԱԾԻՆ ԵԿԵՂԵՑԻ, VIII դ․, Լոռի; ՀԱՌԻՃԱՎԱՆՔ, IIIX դ․, Շիրակ; ՀԱՂԲԱՏԻ ՎԱՆՔ, X-XIII դ․, Տաւուշ; ՏԱԹԵՒԻ ՎԱՆՔ, IX -X դ․, Սիւնիք; ՀԱՅՐԱՎԱՆՔ, IX- XII դ․, Գեղարքունիք; ԳԵՉԱՐԻՍ ՎԱՆՔ, IX–XIII դ․, Վասպուրական; ԳԱՆՁԱՍԱՐՒ ՎԱՆՔ, IX–XIII դ․, Սիւնիք; ԳԵՂԱՐԴԱՎԱՆՔ, IX–XIII դ․, Կոտայք; ՍԱՂՄՈՍԱՎԱՆՔ, X-XIII դ․, Լոռի; ՍՈՒՐԲ  ՀՌԻՓՍԻՄԷ ՏԱՃԱՐ, 618 թ․, Արմաւիր; ՆՈՐԱՎԱՆՔ , IX–XIII դ․, Վասպուրական; ՕՇԱԿԱՆԻ  ՎԱՆՔ, IX–XIII դ․, Արարատ; ՀԱՂԱՐԾԻՆԻ ՎԱՆՔ, IX-XIV դ․, Վայոց Ձոր; ԳՈՇԱՎԱՆՔ, V դ., Արագածոտն; ԱՂԹԱՄԱՐ, XII դ․, Տաւուշ; ՍԵՒԱՆԱՅ ՎԱՆՔ, XI–XIII դ․, Կոտայք:

Հոծ բազմութիւն մը գրաւած էր սրահին  քսան երկու սեղանները. մօտաւորապէս երկու հարիւր եօթանասունհինգ  ներկաներ:

Դեսպան Սամուէլ Մկրտչեան պատուեց Տիկին Անահիտ Տանձիկեանը՝ Սփիւրքի Նախարար…

Սեղաններուն վրայ զետեղուած էր Համախմբումի գործունէութիւնը  պարփակող գրքոյկ մը՝ պատրաստուած ամենայն խնամքով․ գրքոյկ մը, որ կը պարունակէր Ամենայն Հայոց  Ն.Ս.Օ.Տ.Տ.  Գարեգին  Բ. Կաթողիկոսի խօսքերէն, զանազան տարիներու  ընթացքին յուշանուէր ստացող անդամներու անուանացանկը եւ այլ հետաքրքրական նիւթեր։ Գրքոյկին  կ’ընկերակցէր Համախմբումի վարչութեան կողմէ պատրաստուած ծրար մը, որ կը պարունակէր պատարագի խտասալիկ մը, պատարագամատոյց եւ  Սուրբ Էջմիածին՝ ԹԱՆԳԱՐԱՆ ԲԱՑ ԵՐԿՆՔԻ ՏԱԿ բացայայտող Սուրբ Էջմիածնի կառոյցներու անուանացանկը  եւ փոքր սրբանկար  մը։   Կից  կարելի էր տեսնել սրտաբուխ  նուիրատուութիւններու   համար  թղթիկ մը՝ նշուած, որ  հանդիսութեան հասոյթը պիտի յատկացուէր Սուրբ Էջմիածնի  Հայ Եկեղեցւոյ Երիտասարդաց Միութեան:

Համախմբումի վարչութեան անդամ   Անի Պոտրումեան բարի գալուստ մաղթեց ներկաներուն:  Ներկաները  յոտնկայս ունկնդրեցին  Հայաստանի եւ Լիբանանի քայլերգերը, որմէ ետք լիբանանահայ  վաստակաւոր  թենոր Ճոնի Կէօքճեան, դաշնակի վրայ Օլկա Պոլունի ընկերակցութեամբ մատուցեց «Էջմիածին» եւ «Հայրապետական մաղթանք»-ները: Հանդիսութեան  ընթացքին անոնք ներկաները հմայեցին իրենց որակաւոր եւ  ճոխ   երգացանկով:

 Համախմբումի ատենապետուհի Տիկին Անահիտ Տանձիկեան փոխանցեց  վարչութեան խօսքը: Ան քրիստոնէական անհուն սիրով եւ անկեղծ զգացումներով ողջունեց սրահին ներկաները: Ապա համառօտ ներկայացուց Համախմբումին առաքելութիւնը, անոր հատած 58-ամեայ ճանապարհը: Այս  ծիրին մէջ ան նշեց, թէ  1-8 Սեպտեմբեր  2018-ին Ամենայն  Հայոց Ն.Ս.Օ.Տ.Տ.  Գարեգին Բ. Կաթողիկոսի հրաւէրով ուխտագնացութին  մը տեղի պիտի ունենայ  դէպի  Մայր Աթոռ Սուրբ Էջմիածին, որուն արդէն իսկ ցուցակագրուած են 75 անդամուհիներ, ոմանք իրենց ամուսիններուն եւ զաւակներուն ընկերակցութեամբ:  Տիկին Անահիտ  Տանձիկեան  շնորհակալութիւն  յայտնեց Գերաշնորհ եւ Հոգեշնորհ  հայրերուն, Պրն. դեսպանին, որոնք իրենց ներկայութեամբ կը պատուէին սոյն  հանդիսութիւնը: Ան երախտագիտութիւն յայտնեց Համախմբումի հանգուցեալ ատենապետուհիներուն, վարչականուհիներուն, անդամուհիներուն եւ բոլոր անոնց, որոնք Հայ Եկեղեցւոյ ծառայութեան ճանապարհին սատարած են Համախմբումին աշխատանքները.

Ներկաները  յոտնկայս  ունկնդրեցին Գերաշնորհ Տէր Յովնան եպս. Յակոբեանի՝ Լուսարարապետ Մայր Աթոռ Սուրբ Էջմիածնի, Գարեգին Ա. Կրթական Կեդրոնի տնօրէն, Վանական Խորհուրդի ատենապետ, Մայրավանքի Տեսչութեան տեսուչ, Վերստուգիչ եւ Կարգապահական Յանձնախումբի անդամ՝ ընթերցմամբ Ն.Ս.Օ.Տ.Տ. Գարեգին Բ. Ամենայն Հայոց կաթողիկոսի Հայրապետական «Գիր  Օրհնութիւն»-ը  Սուրբ Էջմիածնի Կրօնասէր Տիկնանց Համախմբումին՝ առ ի գնահատանք անոր   բազմամեայ  բեղուն գործունէութեան:  

Գերաշնորհ Տէր Արմաշ Եպիսկոպոս Նալպանտեան կը յանձնէ Գիր Օրհնութեան Տիկ Ազ…

Ապա բանախօսեց Մայր Աթոռ Ս. Էջմիածնի Գէորգեան Հոգեւոր Ճեմարանին տեսուչ Արժանապատիւ Տէր Գարեգին Վարդապետ Համբարձումեանը: Ան կատարեց  Մայր Աթոռ Սուրբ  Էջմիածնի եւ Հայորդաց  Տուներու համառօտ պատմականը, յատկապէս  Սուրբ Էջմիածնի՝ իբրեւ  քրիստոնէական  հաւատքի կեդրոնի դերակատարութիւնը Հայաստանի եւ  համայնատարած  հայ ժողովուրդի  զաւակներուն մէջ:

Ներկաները  պաստառի վրայ մեծ հետաքրքրութեամբ հետեւեցան Մայր Աթոռ Սուրբ Էջմիածնի մասին «Շողակաթ» հեռատեսիլի կայանին պատրաստած հաղորդումը, զոր ներկայացուց   Ամենայն  Հայոց Ն.Ս.Օ.Տ.Տ.  Գարեգին Բ. Կաթողիկոսի  գահակալութեան ժամանակաշրջանին Սուրբ Էջմիածնի մէջ կատարուած  վերաշինութիւնները: Յայտագիրը լուսարձակի տակ առած էր  նաեւ Հայորդաց  Տան եւ Գէորգեան Հոգեւոր Ճեմարանին մէջ  ջամբուող  հոգեւոր դաստիարակութիւնը:

Հացկերոյթին համադամ եւ  որակաւոր  ճաշերը  կը սպասարկէր  «Մայրիկ»  ճաշարանը:

Խանդավառ մթնոլորտի մէջ  հրապարակ  իջան  վիճակահանութիւնները: Բախտաւորները ստացան արժէքաւոր  նուէրներ:

Շարունակելով  հանդիսութիւնը՝ դարձեալ յոտնկայս Դամասկոսի  Թեմի   Բարեջան Առաջնորդ Գերաշնորհ Տէր Արմաշ եպիսկոպոս Նալպանտեան ընթերցեց Ն.Ս.Օ.Տ.Տ․Գարեգին Բ. Ամենայն Հայոց կաթողիկոսի Հայրապետական «Գիր  Օրհնութիւն»-ը լիբանանահայ  մտաւորականուհի, հրապարակագիր, հեղինակ Տիկին Ազատուհի Սիմոնեանին։

Երախտագիտութեան  անհուն արտայայտութիւն մըն էր Համախմբումի վարչութեան անունով երկարամեայ  Պատուոյ վարչականուհի Միմի Յարութիւնեանը եւ  ատենապետուհի Անահիտ  Տանձիկեանը յատուկ յուշանուէրով պատուելու  անակնկալը՝  առ ի գնահատանք անոնց նուիրեալ եւ  հետեւողական ծառայութիւններուն:

Նոյն պահուն նոյնքան մեծ անակնկալ մըն էր Լիբանանի մէջ Հայաստանի արտակարգ եւ լիազօր դեսպան Սամուէլ Մկրտիչեանի ձեռամբ՝ Սփիւռքի նախարարութեան ոսկէ  մետալով լիբանանահայ  հանրածանօթ ազգային, հասարակական ամոլ տէր եւ տիկին  Հրայր եւ Անահիտ Տանձիկեանը պարգեւատրութիւնը:
Ապա տեղի ունեցաւ Համախմբումի երկարամեայ ծառայողներուն պարգեւատրութիւնը:
45-ամեայ  ծառայութեան  համար պարգեւատրում՝
Լիպարիտեան Սիլվա
Սիմոնեան Ազատուհի
Սարգիսեան Ֆրիտա

35-ամեայ  ծառայութեան  համար պարգեւատրում՝ 
Սարաֆեան Մարինա
Ասիլեան Աղաւնի
Երամեան Լիւսի

30-ամեայ  ծառայութեան համար պարգեւատրում՝
Գոճաօղլանեան Սեդա
Զենեան Մարօ

25-ամեայ  ծառայութեան  համար պարգեւատրում՝ 
Պապոյեան Զարուկ
Գոլաճեան Սեդա
Գոլաճեան Վիքի
Բարթիեան Ազատուհի
Բարթիեան Զուարդ
Իւրնէշլեան Ծովակ
Ճանճանեան Անժէլ
Խուրի Յասմիկ
Ճեպեճեան Լենա

20-ամեայ  ծառայութեան  համար պարգեւատրում՝ 
Այվազեան Արինա
Մազլումեան Հռիփ
Ուզունեան Շաքէ

10-ամեայ  ծառայութեան   համար  պարգեւատրում՝
Եագուպեան Մանուէլ
Սիւնկիւլեան Վերժին
Պուլտուքեան Նարդուհի
Պուլտուքեան Նաթալի
Պուլտուքեան Մարիա
Գուտուզեան Եւա
Շէօհմէլեան Ազնիւ
Սերոբեան Ազատուհի

Շնորհակալական խօսքով  հանդէս եկաւ Համախմբումի ատենապետուհի  Անահիտ Տանձիկեանը: Ան  հերթաբար  ընթերցեց սոյն  հանդիսութեան առիթով կատարուած նուիրատուութիւններու  ցանկը:

Հանդիսութեան հուսկ բանքը կատարեց Մեծի Տանն Կիլիկիոյ տեղեկատուական  հարցերու  պատասխանատու Հոգեշնորհ Տէր Պետրոս վարդ․ Մանուէլեանը: Ան  բարձր գնահատեց  Հայ եկեղեցւոյ  ծառայութեան  ճանապարհին  Սուրբ Էջմիածնի Կրօնասէր Տիկնանց  Համախմբումին  բազմամեայ եւ  բազմատեսակ  աշխատանքները:

Սովորական  հացկերոյթ- հանդիսութիւն մը չէր Սուրբ Էջմիածնի Կրօնասէր Տիկնանց  58-ամեակի տարեդարձը, այլ Հայ  եկեղեցւոյ ծառայութեան  համար  ուխտի վերանորոգութեան   հաւաք:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին