Հինգշաբթի, 25. 07. 2024

spot_img

Երեւանի Պետական Համալսարան – ԵՊՀ-ականները Ներկայ Էին Թաներ Աքճամի Դասախօսութեան

*ՄԻԼԵՆԱ ՄԿՐՏՉԵԱՆ*
ԵՊՀ լրագրութեան բաժնի
2-րդ դասընթացքի ուսանողուհի

Թուրք պատմագիր, ընկերաբան, գրող, Քլարքի համալսարանի փրոֆէսոր Թաներ Աքճամը Ապրիլ 27-ին Պէյրութի Ամերիկեան համալսարանին մէջ հանդէս եկաւ դասախօսութեամբ, որուն ներկայ էր նաեւ ԵՊՀ Հայագիտական հետազօտութիւններու հիմնարկը ներկայացնող պատուիրակութիւնը:

Թաներ Աքճամը յայտնի է որպէս առաջին թուրք գիտնականներէն մէկը, որ կը ճանչնայ եւ բացայայտօրէն կը քննարկէ Հայոց Ցեղասպանութեան թեման տարբեր հարթակներու վրայ։ Աքճամը գիտական ուսումնասիրութիւններ կը կատարէ Հայոց Ցեղասպանութեան հիմնահարցին շուրջ:

Պէյրութի Ամերիկեան համալսարանին մէջ Թաներ Աքճամի դասախօսութեան ներկայ էր նաեւ Լիբանանի մէջ ՀՀ արտակարգ եւ լիազօր դեսպան Սամուէլ Մկրտչեանը:

Ելոյթի ընթացքին Աքճամը ներկայացուց իր «Killing Orders: Talat Pasha’s Telegrams and the Armenian Genocide» գիրքը: Ան անդրադարձաւ Թուրքիոյ ժխտողական քաղաքականութեան, այդ ժխտողականութիւնը յառաջացնող հանգամանքներուն, առանձնացուց մի քանի օրինակներ, որոնցմէ մէկը, օրինակ,  կ’առնչուէր Գրիգոր Զօհրապի մահուան պատմութեան իրական պատճառներուն եւ Օսմանեան կայսրութեան կողմէ ներկայացուող տարբերակին: Տեսաշարի միջոցով Աքճամը ցոյց տուաւ նաեւ որոշ նամակագրութիւններ, որոնք ուսումնասիրուած էին մասնագէտներու կողմէ:

Դասախօսութեան աւարտին ներկաները հնարաւորութիւն ունեցան հարցեր ուղղելու Աքճամին, սակայն ժամանակը բաւարար էր միայն երկու հարցումի, թէեւ դահլիճին մէջ ներկայ գտնուողներու շարքին կային մարդիկ, որոնք ցանկութիւն ունէին հարցեր յղելու փրոֆէսորին: Այնուամենայնիւ, երկու հարցերէն մէկը ուղղեց ԵՊՀ Հայագիտական հետազօտութիւններու հիմնարկի «Ցեղասպանագիտութիւն» մագիստրոսական ծրագիրին մէջ սորվող ուսանողներէն մէկը:

Դասախօսութենէն ստացած մեր տպաւորութիւններուն մասին զրուցեցինք նաեւ Երեւանէն ժամանած պատուիրակութեան ցեղասպանագէտներուն հետ: Անոնք փաստեցին, որ դասախօսութեան նիւթի հիմնական մասին շատ լաւ ծանօթ էին, քանի որ Թաներ Աքճամի կողմէ ներկայացուած նիւթերէն մեծ մասը ուսումնասիրած էին Երեւանի Պետական համալսարանին մէջ՝ մասնագիտական առարկաներու ուսումնառութեան ժամանակ: Ըստ երիտասարդներուն՝ իրենք դասախօսութեան աւարտին կը ցանկային աւելի շատ հարցեր ուղղել բանախօս Թաներ Աքճամին, սակայն, ցաւօք, այդ հնարաւորութիւնը չունեցան:

Տեղեկացնենք նաեւ, որ դասախօսութեան աւարտին Թաներ Աքճամի «Killing Orders: Talat Pasha’s Telegrams and the Armenian Genocide» գիրքի շուրջ 50 օրինակ վաճառուեցաւ ներկաներուն՝ իւրաքանչիւրը 40 ամ. տոլարի: Ներկաները բախտը ունեցան գիրքը հեղինակին մակագրութեամբ ստանալու:

Թաներ Աքճամը հայ-թուրք յարաբերութիւններուն եւ Հայոց Ցեղասպանութեան մասին հեղինակած է նաեւ «Հայերու բռնի իսլամացումը. լռութիւն, ժխտում եւ ձուլում», «Երկխօսութիւն միջազգային ջրբաժանի շուրջ. գրառումներ հայ-թրքական երկխօսութեան վերաբերեալ», «Երիտթուրքերու` մարդկութեան դէմ կատարած յանցագործութիւնը. Հայոց Ցեղասպանութիւնը եւ էթնիկ զտումները Օսմանեան կայսրութեան մէջ», «Ամօթալի արարք. Հայկական Ցեղասպանութիւնը եւ թրքական պատասխանատուութեան խնդիրը» եւ շարք մը այլ գիրքեր:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին