Սահմանագիծին վրայ հակառակորդի տեղաշարժերուն, աշխուժացման, Հայաստանի մէջ ներքաղաքական իրավիճակի՝ պաշտպանութեան բանակի վրայ ունեցած հնարաւոր ազդեցութեան հարցերուն մասին «Panorama.am»-ը խօսած է Արցախի նախագահի խորհրդական Տիգրան Աբրահամեանի հետ:
–Սահմանի վրայ հակառակորդին կողմէ կուտակումները կը շարունակուի՞ն:
-Հակառակորդին՝ տարբեր ուղղութիւններով շարժերն ու կուտակումները կը շարունակուին: ՊԲ-ը կը հետեւի անոնց եւ ըստ անհրաժեշտութեան գործուն քայլերու կը ձեռնարկէ:
–Կուտակումներուն զուգահեռ ազրպէյճանական կողմէ աշխուժացում՝ յարձակման փորձերու, հետախուզական խումբերու ներթափանցման կամ այլ տեսքով եղա՞ծ է:
-Վերջին տարիներուն առաջնագիծին վրայ իրականացած գիտարուեստական վերազինման արդիւնքով հակառակորդին կողմէ յարձակման գործողութիւններ իրականացնելու վտանքները կտրուկ նուազած են: Հակառակորդը առաջնագիծին վրայ աշխուժութիւն կը մտցնէ դիպուկահար խումբերու, ծանր գնդացիրներու, ինչպէս նաեւ առաջնագիծին վրայ կտրուկ տեղաշարժերու միջոցով:
–Հայաստանի մէջ ստեղծուած ներքաղաքական իրավիճակը որեւէ ազդեցութիւն կը ձգէ՞ ՊԲ մարտունակութեան վրայ:
-Պաշտպանութեան բանակը իր ամէնօրեայ ծառայութեամբ անընդհատ կը ձգտի բարձրացնել իր մարտունակութիւնը: Տրամաբանօրէն հայաստանեան ներքաղաքական զարգացումները չեն կրնար ազդեցութիւն չունենալ առաջնագիծին վրայ տիրող իրավիճակին, մասնաւորապէս հակառակորդի վարքագիծին վրայ: Սակայն պէտք է ընդգծեմ, որ պաշտպանութեան բանակն ու անոր զինծառայողները գիտակից իրենց առաքելութեան եւ պատուով կը կատարեն իրենց վրայ դրուած մարտական խնդիրը: Մեր զինուորը իր տեղն է, լաւագոյնս կը տիրապետէ Արցախի շուրջ տեղի ունեցող զարգացումներուն եւ պատրաստ է որեւէ իրավիճակի մէջ զսպելու, հակազդելու Ազրպէյճանի քայլերը, զորս վտանգ կը ներկայացնէ մեր անվտանգութեան համար:
