ՀՀ վարչապետի պաշտօնակատար Կարէն Կարապետեանի մամուլի խօսնակ Արամ Արարատեանը յայտարարութեամբ հանդէս եկած է Նիկոլ Փաշինեանի՝ երէկ «Մարիոթ» հիւրանոցին մէջ կայանալիք բանակցութիւններու հրաւէրին վերաբերեալ: Յայտարարութեան մէջ մասնաւորապէս ըսուած է.
«Նիկոլ Փաշինեանի հերթական հրաւէրը նախորդէն գործնականօրէն չի տարբերիր, բացի անկէ, որ այս անգամ չի թելադրեր, թէ որո՛ւն հետ պէտք է բանակցութիւններուն գալ:
Կարէն Կարապետեանի պատասխանը նոյնն է, ինչ նախորդ անգամ էր: Բանակցութիւնները, ուր մէկ կողմը բացառապէս օրակարգ կը թելադրէ, իսկ միւսը չի կրնար օրակարգ ներկայացնել՝ չեն կրնար պայմանաւորուիլ:
Բացի այդ, Կարէն Կարապետեանը այն տեսակէտին է, որ լրատուամիջոցներուն առջեւ բանակցութիւններու կայացումը արդէն իսկ կ’ենթադրէ, որ բանակցութիւններու նպատակը որեւէ արդիւնք արձանագրելը չէ:
Այդ իսկ պատճառով մասնակցիլ «բանակցութիւններու», որոնք լուծումներ գտնելու հաւանականութիւն չունին, վարչապետի պաշտօնակատարը անհեռանկարային կը համարէ:
Կարէն Կարապետեանի կարծիքով՝ Պարոն Փաշինեանի կողմէ կ’արժէ ընդունիլ խորհրդարանական եւ արտախորհրդարանական բոլոր ուժերուն ուղղուած Հանրապետութեան նախագահի առաջարկը՝ երկրին մէջ ստեղծուած իրավիճակը եւ անկէ դուրս գալու ուղիները համատեղ քննարկելու մասին»:
