Ընդառաջելով իրեն ուղղուած առաջարկին՝ Ապրիլ 25-ի ամբողջ օրուան ընթացքին Հանրապետութեան նախագահ Արմէն Սարգսեան շարք մը բանակցութիւններ վարած է խորհրդարանական եւ արտախորհրդարանական ուժերու ներկայացուցիչներուն, ինչպէս նաեւ հասարակական-քաղաքական գործիչներուն հետ երկրին մէջ ստեղծուած իրավիճակին եւ վերջինէս դուրս գալու ուղիներուն շուրջ:
Ինչպէս «Արմէնփրես»-ին տեղեկացուցին ՀՀ նախագահի աշխատակազմէն, քննարկումներուն ընթացքին բոլոր մասնակիցները համակարծիք եղած են, որ արծարծուած հարցերը պէտք է լուծուին սահմանադրութեան ծիրէն ներս՝ ներառելով սահմանադրական բոլոր գործընթացները, ընդհուպ մինչեւ խորհրդարանական արտահերթ ընտրութիւնները՝ անհրաժեշտութեան պարագային մինչ այդ փոփոխութիւններ կատարելով ընտրական օրէնսգիրքին եւ սահմանադրութեան հետ կապուած օրէնքներուն մէջ:
