ՀՀ Ազգային ժողովի նախագահ Արա Պապլոյեանը արձագանգած է երկրին մէջ առկայ լարուած իրավիճակին: Ինչպէս «Արմէնփրես»-ին տեղեկացուցին ԱԺ հանրային կապերու վարչութենէն, յայտարարութեան մէջ կ’ըսուի.
«Հայաստանի Հանրապետութեան սիրելի՛ քաղաքացիներ, սիրելի՛ հայրենակիցներ,
Վերջին օրերին բազմաթիւ քաղաքացիներ փողոցներում եւ հրապարակներում իրենց բողոքի ձայնն են բարձրացնում՝ ուղղուած Հայաստանի Հանրապետութեան իշխանութեանը: Բողոքի այսօրինակ դրսեւորումները բնորոշ են ժողովրդավարական պետութիւններին:
Յարգելի՛ հայրենակիցներ, ամենայն մանրամասնութեամբ հետեւել եմ ծաւալուող բոլոր իրադարձութիւններին, հանրահաւաքների ընթացքին, կազմակերպիչների եւ իրաւապահ մարմինների քայլերին ու հռետորաբանութեանը: Ցաւօք, որոշ դէպքերում արձանագրուել են նաեւ իրաւախախտումներ, այլ անձանց իրաւունքների ոտնահարման դէպքեր, որոնց նկատմամբ իշխանութիւնը մշտապէս ցուցաբերել է հաւասարակշռուած վերաբերմունք՝ յաճախ գնալով զիջումների: Միջազգային տարբեր հարթակներից, Սփիւռքից, քաղաքացիական հասարակութիւնից, բազմաթիւ քաղաքական ուժերից, ինչպէս նաեւ իշխանութեան կողմից հնչել են բանակցելու, քննարկումներ կազմակերպելու, իրավիճակը սրացումից զերծ պահելու բազմաթիւ յորդորներ: Հանրապետութեան նախագահն անձամբ է այցելել դժգոհութիւնների ամենաթէժ հարթակ ու ՀՀ ԱԺ պատգամաւոր Նիկոլ Փաշինեանին յորդորել նստել քաղաքական երկխօսութեան: Դրան յաջորդել է ՀՀ վարչապետ Սերժ Սարգսեանի եւ պատգամաւոր Նիկոլ Փաշինեանի հանդիպումը: Ցաւօք, այս վերջին հանդիպումից ակնյայտ դարձաւ, որ Նիկոլ Փաշինեանը հակուած չէ խնդրի լուծմանն ուղղուած քաղաքական քննարկումների, փոխզիջումների, ինչն էլ հնարաւորութիւն պիտի տար կանխելու հնարաւոր ծանր հետեւանքները, հանդարտեցնելու վիճակն ու սկսելու կառուցողական աշխատանք: Այս իրավիճակում, երբ մերժելով քաղաքական երկխօսութիւնը, ընտրելով ամէն ինչ կամ ոչինչ մարտավարութիւնը, բողոքի միջոցառումների կազմակերպիչներն ու առաջնորդները պարտաւոր են գիտակցել, որ դրանով հետագայ բոլոր զարգացումները, այդ թուում ամենածանրը, վերցնում են իրենց ուսերին եւ կրելու են համարժէք պատասխանատուութիւն:
Ուստի, գնահատելով ստեղծուած իրավիճակը, գիտակցելով կարգ ու կանոն հաստատելու պետութեան պարտականութիւնը՝ կոչ եմ անում ցուցաբերել ողջախոհութիւն, արժեւորել իւրաքանչիւրիս սահմանադրական իրաւունքները, պարտականութիւնները եւ նստել քաղաքական քննարկումների սեղանի շուրջ:
Վստահ եմ, որ Հայաստանի Հանրապետութիւնն ունի քաղաքական եւ իրաւական բոլոր գործիքները՝ իրավիճակի անցնցում եւ ողջամիտ հանգուցալուծմանը հասնելու համար:
Զսպուածութեան ու հանդուրժողականութեան կոչ եմ անում մեր քաղաքացիներին, բոլոր քաղաքական ուժերին, մեր քոյրերին ու եղբայրներին, մեր զաւակներին ու երիտասարդներին:
Ես հաւատում եմ մեր ժողովրդի իմաստնութեանը»:
