Շաբաթ, 20. 07. 2024

spot_img

Մարաղայի Կոտորածի 26-րդ Տարելիցը Յիշատակուեցաւ Նոր Մարաղայի Մէջ

Ապրիլ 10-ին, Նոր Մարաղայի մէջ տեղի ունեցաւ յիշատակի ձեռնարկ` նուիրուած գիւղի կոտորածի 26-րդ տարելիցին:

Ըստ «Արցախփրես»-ի՝ ներկաները նախ ծաղիկներ խոնարհեցին Մարաղայի զոհուած հերոսներու յիշատակին   կանգնեցուած յուշաքարին:

Այնուհետեւ գիւղի ազատագրման ժամանակ զոհուած հրամանատար Վագիֆ Համբարձումեանի անունը կրող միջնակարգ դպրոցի աշակերտները հանդէս եկան հայրենասիրական բանաստեղծութիւններով եւ երգերով:

Ելոյթ ունեցաւ դպրոցի տնօրէն Լիւդա Գրիգորեան: Ան, վերյիշելով 1992 թուականի Մարաղայի դժնդակ դէպքերը, դատապարտեց բոլոր ոճրագործները:

Մարաղա գիւղի ինքնապաշտպանական ջոկատի հրամանատար, համայնքի ղեկավար Ռոմա Կարապետեան պատմած է, որ 1992  թուականի Ապրիլ 9-ի լոյս 10-ի գիշերը ազրպէյճանցի հրոսակները՝ կիրարկելով տարբեր զինատեսակներ, պարբերաբար հրետակոծած են գիւղը:

Ըստ անոր` Մարտակերտի շրջանի բոլոր ջոկատներու հրամանատարները նոյն օրը հրաւիրած են խորհրդակցութեան եւ կազմած Մարաղայի ազատագրման ծրագիրը:

Ան նշած է նաեւ, որ Մարաղայի վերջնական ազատագրումը իրականացուած է 1992 թուականի Ապրիլ 10-ի գիշերը:

«Մարաղայի ազատագրման  ժամանակ  զոհուած է 51 խաղաղ բնակիչ, 38-ը պատանդ առնուած է, որմէ  24-ը հետագային փոխանակուած է, իսկ 14 հոգիի ճակատագիրը մինչ այսօր անյայտ  է»,- ըսած  Կարապետեան:

Ձեռնարկին ներկայ էին Մարտակերտի շրջանի վարչակազմի  ղեկավարի տեղակալ Նուէր  Սայիեանը, Արցախի ազատամարտիկներու միութեան Մարտակերտի  քաղաքային  կազմակերպութեան  նախագահ Նիքոլայ  Աւագիմեանը, Մարաղայի  բնակիչներ, հիւրեր եւ այլք:

Նշենք, որ երէկ Մարտակերտի Մշակոյթի եւ Երիտասարդութեան կեդրոնին մէջ տեղի ունեցաւ Մարաղայի ջարդերու մասին պատմուող փաստավաւերագրական ֆիլմի ցուցադրութիւն, իսկ Ս. Կարապետ եկեղեցւոյ մէջ` ոգեկոչման արարողութիւն, որմէ ետք ներկաները մոմերով եւ  ոճրագործութիւնը դատապարտող  պաստառներով   կազմակերպեցին երթ դէպի Մարտակերտի «Փառք   ազատամարտիկներուն» յուշահամալիր:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին