Հայկական բանակը նախորդ շաբաթ անակնկալ ու յանկարծակի զօրավարժութիւն կատարած է Հայաստանի հիւսիս-արեւելեան սահմանագիծին մօտ։ ՀՀ Զինուած ուժերու Երկրորդ բանակային զօրասիւնի ստորաբաժանումները՝ առաջին անգամ ըլլալով սահմանագիծի անմիջական պահպանութեան տեղամասին մօտ, լեռնային պայմաններու մարտական հնարաւոր յարձակման գործողութ՚իւններու զսպման զօրավարժութիւններ կատարած են, որոնց հետեւած են ՀՀ պաշտպանութեան նախարար Վիգէն Սարգսեանը եւ բանակի գլխաւոր անձնակազմի պետ զօրավար Մովսէս Յակոբեան։
Զօրավարժութեան ընթացքին ՀՀ զինուած ուժերը կասեցուցած է թշնամիի յանկարծակի յարձակումը եւ ոչնչացուցած վերջինիս ստորաբաժանումները՝ կիրարկելով ռազմական նոր սարքեր:
Բացի զօրքերու պատրաստուածութեան ստուգումէն, զօրավարժութեան նպատակներէն մէկը եղած է նաեւ Քարվաճառի բնակչութեան, ինչպէս նաեւ Սոթք-Քարվաճառ մայրուղիի անվտանգութեան ապահովման ստուգումը:
