Մարտ 24-ին Կլենտէյլի (Լոս Անճելըս) Պրէնտ պուրակի հանրային գրադարանին մէջ տեղի ունեցաւ «Հայ լուսանկարիչները Օսմանեան կայսրութեան մէջ եւ անոր շուրջը» թեմայով գիտաժողով մը, որուն նախաձեռնողն էր փիլիսոփայութեան փրոֆէսոր Արմէն Մասրուբեանը:
Գրադարանի ցուցասրահին մէջ նոյն օրը բացուեցաւ նաեւ «Հայ ընտանիքի ոդիսականը. շարունակականութիւն եւ կորուստ» ցուցադրութիւնը, ուր ներկայացուած են Դիլդիլեան ընտանիքի լուսանկարչական աշխատանքները:
Արմէն Մասրուբեանի մեծ հայրն ու մեծհօր եղբայրը՝ Ցոլակ եւ Արամ Դիլդիլեան լուսանկարիչներն էին, որոնք յաճախած են Մարսովան գիւղի «Անատոլիա» հանրայայտ գոլէճ: Մասրուբեանը իր ընտանիքէն ժառանգած է աւելի քան 600 լուսանկար եւ ապակեայ negative-ներ, որոնց մեծ մասը առնուած են 1910-1922 թուականներուն:
Ցուցադրութիւնը պիտի գործէ մինչեւ Ապրիլ 27:
Նշենք, որ այդ ցուցադրութենէն ներկայացուող՝ 1910 թուականին առնուած ուշագրաւ լուսանկարը կը պատկերէ «Անատոլիա» գոլէճի լսողութեան խանգարում ունեցող հայ երեխաները, որոնք հայելիներու միջոցով կը սորվին ճիշդ արտաբերել հնչիւնները:
