Նախագահ Սերժ Սարգսեան Ապրիլ 4-ին պաշտօնական այցով մեկնեցաւ Սուրբ Աթոռ (Վատիկան): Հանրապետութեան նախագահը հանդիպումներ կ’ունենայ Հռոմի Պապ Նորին Սրբութիւն Ֆրանչիսկոսի, Սուրբ Աթոռի պետական քարտուղար Քարտինալ Փիետրօ Փարոլինի հետ, կը մասնակցի Վատիկանի մէջ «Տիեզերական Եկեղեցւոյ վարդապետ» հռչակուած Աստուածաշնորհ Սուրբ Գրիգոր Նարեկացիի արձանի բացման արարողութեան, որմէ ետք տեղի կ’ունենայ միջքրիստոնէական արարողութիւն` Հռոմի Սրբազան Քահանայապետ Ֆրանչիսկոս Պապի, Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի ու Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսի մասնակցութեամբ:
Ինչպէս «Արմէնփրես»-ին տեղեկացուցին ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն, հանրապետութեան նախագահի Ապրիլ 4-6 կայանալիք այցի ծիրէն ներս հանդիպում կը նախատեսուի նաեւ Մալթայի Ինքնիշխան Մարտական Ուխտի Մեծ վարպետի տեղապահ Ֆրա Ջակոմօ Տալլա Թոռէ Տել Տեմպիօ տի Սանկուինեթոյի հետ: Հայաստանի Հանրապետութեան եւ Երուսաղէմի Ս. Յովհաննէսի, Հռոդոսի եւ Մալթայի ինքնիշխան մարտական բարեխնամ ուխտի (Մալթայի ինքնիշխան ուխտ) միջեւ կը ստորագրուի համագործակցութեան համաձայնագիր, որմէ ետք Սերժ Սարգսեան եւ Ֆրա Ջակոմօ Տալլա Թոռէ Տել Տեմպիօ տի Սանկուինեթօ հանդէս կու գան ԶԼՄ-ներու առջեւ յայտարարութիւններով:
Նախագահ Սարգսեան աշխատանքային այց կը կատարէ նաեւ Իտալիոյ Հանրապետութիւն, ուր հանդիպումներ կ’ունենայ Իտալիոյ նախագահ Սերժիօ Մաթարելլայի, Սենատի նախագահ Մարիա Էլիզապեթա Քազելաթիի եւ Պատգամաւորներու պալատի նախագահ Ռոպերթօ Ֆիքոյի հետ:
