Հինգշաբթի, 25. 07. 2024

spot_img

Երեւանի «Մալաթիա» Արուեստի Դպրոցը Անուանակոչուած Է Կոնստանդին Օրբէլեանի Անունով

Երեւանի երաժշտական եւ արուեստի շուրջ 25 դպրոցներէն միայն մէկն էր, որ ոեւէ ականաւոր արուեստի գործիչի անունը չէր կրեր. ատիկա «Մալաթիա» արուեստի դպրոցն էր: Այս տարուան Փետրուար 13-ին գումարուած Երեւանի աւագանիի նիստին ընթացքին աւագանիի անդամները հաւանութիւն տուած են Երեւանի «Մալաթիա» արուեստի դպրոցը ԽՍՀՄ եւ ՀՀ ժողովրդական արտիստ Կոնստանդին Օրբէլեանի անունով անուանափոխելու որոշման նախագիծին: Պաշտօնական ցուցատախտակը արդէն փակցուած է դպրոցի մուտքին, բայց հանդիսաւոր բացումը տեղի պիտի ունենայ Յունիսին Կամերային երաժշտութեան տան մէջ կայանալիք հաշուետու համերգի հանդիսաւոր միջոցառման ժամանակ, իսկ Սեպտեմբերին դպրոցի շէնքի պատին պիտի տեղադրուի Օրբէլեանի դիմաքանդակը:

Մինչ այդ, Մարտ 26-ին դպրոցին մէջ պաշտօնական անուանափոխութենէն ետք տեղի ունեցաւ առաջին միջոցառումը՝ նուիրուած Թատրոնի համաշխարհային օրուան: Այդ օրը Երեւանի Կոնստանդին Օրբէլեանի անուան արուեստի դպրոցին մէջ տօնական եռուզեռ էր: Հիւրընկալած էին յայտնի դերասանուհի, ՀՀ վաստակաւոր արտիստ Էվելինա Շահիրեանը եւ իր դստերը՝ դերասանուհի Նաիրա Շահիրեանը: Դասական ու ժամանակակից թեմաներով թատերական հետաքրքրական ներկայացում, թմբուկներով ազդեցիկ ու տպաւորիչ կատարում, իսկ աւարտին` անկեղծ զրոյց դերասաններուն հետ: 1972 թուականին հիմնադրուած արուեստի այս կրթօճախը սկիզբը գործած է իբրեւ երաժշտական դպրոց, 1999 թուականին դարձած է արուեստի դպրոց, քանի որ ոչ միայն երաժշտական գործիքներու եւ երգեցողութեան, այլ նաեւ պարի, կերպարուեստի, թատերական բաժիններու մեծ պահանջարկ կար: Այսօր դպրոցը ունի շուրջ 300 աշակերտ եւ 53 հոգինոց համերաշխ խումբ:

Արինա Մանուկեանը հոս կ’աշխատի 1990 թուականէն: 1997-էն դպրոցի փոխտնօրէնն է: Տիկին Արինան, կարելի է ասել, դպրոցի եռանդուն ոգին է՝ անսպառ աշխուժութեամբ: Կը պատմէ, որ դպրոցը Կոնստանդին Օրբէլեանի անունով անուանակոչելու միտքը ծնած է անուանի երաժիշտի մահուան ժամանակ՝ 2014 թուականին: Տիկին Արինան չէ համբերած եւ Օրբէլեանի հոգեհանգիստի օրը մօտեցած է անոր զարմիկին՝ Ալ․Սպենդիարեանի անուան օփերայի եւ պալէյի ազգային ակադեմական թատրոնի գեղարուեստական ղեկավար Կոնստանդին Օրբէլեանին ու յայտնած իրենց նախաձեռնութեան մասին: Կրտսեր Օրբէլեանը ընդունած է առաջարկը եւ խոստացած է, որ յառաջիկայ օրերուն կ’այցելէ դպրոց՝ քննարկելու այդ հարցը: «Անկեղծ ըսեմ, մտավախութիւն ունէի, որ թերեւս երաժշտապետը  չգայ կամ մոռնայ մեր առաջարկին մասին: Բայց մի քանի օր անց հեռաձայնեց ու եկաւ,- կը յիշէ տիկին Արինան:- Մեր դպրոցը այդ ժամանակ վերանորոգուած չէր, տեսքը շատ վատ էր: Մտածեցի՝ թերեւս կը զղջայ, որ դրական արձագանգած է մեր առաջարկին: Բայց Օրբէլեանը ոչ միայն համաձայնեցաւ, այլեւ շատ ոգեւորուած էր մեր նախաձեռնութեամբ եւ յուզուած»: Դպրոցի տնօրէն Տաթեւիկ Համբարձումեանը կը կարծէ, որ դպրոցի անուանափոխութիւնը շատ կարեւոր էր ոչ միայն մեծ երգահանին յարգանքի տուրք մատուցելու տեսանկիւնէն, այլեւ դպրոցին իրեն արժանի անուանումով հանդէս գալու եւ իր անունով հպարտանալու առումով: Մեր դպրոցին «Մալաթիա» անուանումը ուղղակի համապատասխան չէր,- կ’ըսէ տնօրէնը:- Չէ՞ որ ասիկա արուեստի դպրոց է: Մենք հիանալի սաներ ունինք, որոնք տեղական ու միջազգային տարբեր մրցոյթներու դափնեկիրներ կը դառնան: Որոշ չափով միշտ վատ կը զգայինք, երբ կը հարցնէին՝ ո՞ր դպրոցը կը ներկայացնէք: Մենք «Մալաթիա» կ’ըսէինք: Այդ անունը շատերուն քով Մալաթիա տօնավաճառին հետ կը շփոթուէր: Այնպէս որ մենք հիմա աւելի հպարտ ենք, որ մեծ երգահան, երաժշտագէտ Կոնստանդին Օրբէլեանի անունը կը կրենք»:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին