Անցեալ շաբաթ Ֆրանսայի Ռոն-Ալփ շրջանի Տեսին-Շարփիէօ քաղաքին մէջ սկսան «Ֆրանսայի մէջ Արցախի օրեր»-ու ծիրին մէջ կազմակերպուած ձեռնարկները: Բացման արարողութեան ներկայ եղան Ֆրանսայի մօտ Արցախի մնայուն ներկայացուցիչ Յովհաննէս Գէորգեան, Տեսին-Շարփիէօի քաղաքապետ Լորանս Ֆոթրա, Ֆրանսա-Արցախ բարեկամութեան շրջանակի նախագահ Ֆրանսուա Ռոշըպլուան, Ֆրանսայի Ազգային ժողովի երեսփոխան Տանիէլ Ղազարեան, Լիոնի մօտ Հայաստանի փոխհիւպատոս Գայանէ Մանուկեան, Քաղաքային խորհուրդի անդամներ, տեղական ինքնակառավարման մարմիններու եւ հասարակական կազմակերպութիւններու ներկայացուցիչներ եւ լրագրողներ:
Ձեռնարկները սկսան ֆրանսացի լուսանկարիչ Իվան Թրավերի «Արցախ. երկրի մը ոգին» խորագիրը կրող լուսանկարներու ցուցահանդէսի ներկայացումով:
«Ֆրանսայի մէջ Արցախի օրեր»-ու ծրագիրին մէջ ընդգրկուած են նաեւ նկարիչ Սիլվեն Սաւոյեայի «Ճանապարհորդութիւն դէպի Արցախ» ջրանկարներու շարքը, Առնօ Խայաճանեանի «Մենք Ենք Մեր Սարերը» վաւերագրական ֆիլմի, Հիւլէ Քէշիշեանի «Արցախը 180 Վայրկեանի Մէջ» ժապաւէններու ցուցադրութիւնները:
Ծրագրուած է ֆրանսահայ մաթեմաթիկոս, պատմաբան Քլոտ-Արմէն Մութաֆեանի «Բացայայտել Արցախը» խորագրեալ դասախօսութիւնը:
Նշենք, որ 25 Սեպտեմբեր 2017-ին բարեկամութեան հռչակագիր ստորագրուած է Արցախի Հանրապետութեան Ճարտար եւ Ֆրանսայի Տեսին-Շարփիէօ քաղաքներուն միջեւ:
