Գրող եւ նկարիչ Մարիամ Պետրոսեանի երեւակայան «Տունը, ուր…» («The Gray House») ռուսալեզու վէպը ընդգրկուած է 21-րդ դարու 10 ամենաընթերցուող գիրքերուշարքին:
Մարիամ Պետրոսեանէն բացի, ցանկին մէջ ընդգրկուած են Ճորճ Մարթինի «Սառոյցի եւ կրակի երգը» վիպաշարը, Սթիվըն Քինկի «11/22/63»-ը, Կրեկորի Տէյվիտ Ռապըրտսի «Շանթարամը», Քորմաք Մաքքարթիի «Ճանապարհը» եւ այլ ստեղծագործութիւններ:
«Մարիամ Պետրոսեան գիրքը սկսած է գրելու դեռ մանկութեան տարիներուն՝ աստիճանաբար ստեղծելով գլխաւոր հերոսները նկարներու եւ տառերու օգնութեամբ: Ձեռագիրի վերջնական տարբերակը պատրաստ էր 1998-ին, իսկ անիկա հրատարակուեցաւ միայն 10 տարի անց: Գիրքը կը նկարագրէ հաշմանդամ երեխաներու կեանքը յատուկ գիշերօթիկ դպրոցի մէջ, որ կը կոչուի` Տուն: Տունը ուղղակի գիշերօթիկ չէ, անիկա առանձին մոլորակ մըն է՝ լի իր գաղտնիքներով ու հանելուկներով»,- կը գրէ Մարիամ Պետրոսեանի վէպի մասին ռուսաստանեան «Fraufluger» հանդէսը:
Ամենաշատ վաճառուող գիրքերու ցանկը կազմուած է՝ ըստ վաճառքի ծաւալներու մասին տուեալներու եւ գրական պարգեւներու:
Մարիամ Պետրոսեան ծնած է Երեւան, աւարտած է Թերլեմեզեանի անուան գեղարուեստի ուսումնարանը` «Նկարիչ-ձեւաւորող» մասնագիտութեամբ: 1989-ին աշխատանքի ընդունուած է «Հայֆիլմ»-ի մէջ: Երկու տարի աշխատած է Մոսկուա: Վերադարձած է Հայաստան, 1995-2007 թուականներուն աշխատած է «Հայֆիլմ»-ի մէջ:
«Տունը, ուր…»-ը գրողին առաջին գիրքն է, որուն վրայ աշխատած է շուրջ տասնութ տարի` 1991-էն մինչեւ գիրքի հրատարակումը` 2009 թուականը:
