Հայաստանի Հանրապետութեան նորընտիր նախագահ Արմէն Սարգսեան Սիլիքոն հովիտի մէջ հանդիպում ունեցաւ տեղեկատուական եւ բարձր արհեստագիտութեանց ոլորտի աւելի քան 100 գործարարներու եւ մասնագէտներու հետ:
«Ասպարէզ»-ի տեղեկութիւններով, հանդիպման ընթացքին քննարկուեցան տեղեկատուական արհեստագիտութեանց ոլորտի զարգացման միտումներն ու մարտահրաւէրները:
Արմէն Սարգսեան, ներկայացնելով տեղեկատուական այս ոլորտին մէջ Հայաստանի մեծ յաջողութիւնները, նշեց. «Ոլորտը շատ արագ կը զարգանայ ու կը փոխուի, հետեւաբար մենք պէտք է ձգտինք կատարելագործման ու աւելի մրցունակ դառնանք»: Ըստ անոր՝ Հայաստանի մէջ գոյութիւն ունի հսկայական ներուժ, որուն ճիշդ ուղղորդումը կը նպաստէ երկրի տնտեսական զարգացման, միջազգային համագործակցութեան ընդլայնման ու ներդրումներու ներգրաւման:
Արմէն Սարգսեան խօսեցաւ նաեւ Հայաստանի զարգացման հեռանկարներուն մասին եւ ներկայացուց երկրի ապագայի իր տեսլականը:
Նորընտիր նախագահը այցելեց նաեւ «Սինոփսիս» ընկերութեան կեդրոնը եւ ծանօթացաւ անոր գործունէութեան ու արձանագրած յաջողութիւններուն:
