Մարտ 20-ին Ֆրանսախօս երկիրներու Խորհրդարանական վեհաժողովի քաղաքական հարցերու կոմիտէի պատուիրակութիւնը այցելած է «Ծիծեռնակաբերդ»-ի յուշահամալիր: Այս մասին կը հաղորդէ «News.am»-ը։
Պատուիրակութիւնը կը ղեկավարէ Ֆրանսայէն Քրիսթոֆ Անտրէ Ֆրասան: Պատուիրակութեան կազմին մէջ են Ֆրանսախօս երկիրներու խորհրդարանական վեհաժողովի անդամ երկիրներու ներկայացուցիչներ: Պատուիրակութեան ուղեկցած է ԱԺ հանրապետական պատգամաւոր Մարգարիտ Եսայեանը։
Պատուիրակութեան անդամները ծաղիկներ դրած են Հայոց Ցեղասպանութեան զոհերու յուշակոթողին եւ անմար կրակին մօտ, զոհերու յիշատակը յարգած են յոտնկայս լռութեամբ: Հիւրերը ծանօթացած են նաեւ Հայոց Ցեղասպանութեան թանգարան-հիմնարկի ցուցադրանմուշներուն` գրութիւն ձգելով Յուշամատեանին մէջ:
«Ես թանգարանէն ստացած մեծ տպաւորութեան ներքոյ եմ: Այստեղ ցուցադրուած է ժողովուրդի սարսափելի պատմութիւնը, որ այս ամէնը վերապրած է: Եւ ասիկա 20-րդ դարու առաջին տրաման է»,- լրագրողներու հետ զրոյցի ընթացքին ըսած է Ֆրասա Քրիսթոֆ-Անտրէն:
