Պոլսոյ մէջ Մարտ 13-14-ին ձեռնարկներ կազմակերպուած են` Անիի ճարտարապետական ժառանգութեան վերաբերեալ: Այդ մասին, ըստ Akunq.net-ի, կը հաղորդէ «Ակօս» շաբաթաթերթը:
Աղբիւրին համաձայն, Մարտ 13-ին, Պոլսոյ «Տեփօ» անուամբ մշակութային կեդրոնին մէջ բացուած է ցուցահանդէս` «Քարերու բանաստեղծութիւնը` Անին. ճարտարապետական գանձարան մշակոյթներու խաչմերուկին» խորագիրով: Ցուցահանդէսին ներկայացուած են 2016-ին ԵՈՒՆԵՍՔՕ-ի համաշխարհային ժառանգութեան ցանկին մէջ ներառուած Անիի մէջ առնուած լուսանկարներ եւ տեսագրութիւններ: Սոյն ցուցահանդէսը այցելուներուն առջեւ բաց պիտի ըլլայ մինչեւ Ապրիլ 29:
Ցուցադրուած են Արա Կիւլերի, Մարտին Մանուկեանի, Մուրատ Կերմենի եւ Վետաթ Աքչագեօզի հեղինակած լուսանկարները:
Իսկ Մարտ 14-ին, Պոլսոյ Ջեզայիր սրահին մէջ տեղի ունեցած է խորհրդաժողով ` «Անի. համաշխարհային մշակոյթի ժառանգութիւն Թուրքիոյ մէջ» խորագիրով, որուն կը մասնակցին Նորվեկիոյ Մշակութային ժառանգութեան ուսումնասիրութեան հիմնարկի նախկին տնօրէն Քարսթեն Փալուտան-Միւլլերը, նոյն հիմնարկի փոխնախագահ Արմէն Ղազարեանը, վերականգնող ճարտարապետ Եաւուզ Օզքայան եւ լուսանկարիչ Վետաթ Աքչագեօզը, որոնք զեկուցումներ պիտի ներկայացնեն` Անիի մշակութային պատմութեան թեմայով:
