Քաշաթաղի շրջանի Իշխանաձոր համայնքին մէջ Արցախի կառավարութեան եւ «Քաշաթաղ» բարեգործական հիմնադրամին համաֆինանսաւորումով, ընթացքի մէջ են 50 նոր առանձնատուներու շինարարական աշխատանքները:
Ըստ «Artsakhpress.am»-ի՝ այս մասին յայտնած է Իշխանաձորի համայնքի ղեկավար Արսէն Թելունց` նշելով, որ, ըստ նախագիծին, մինչեւ տարեվերջ բնակարանները շահագործման պիտի յանձնուին:
Համայնքի ղեկավարին խօսքով` 2016-2017 գիւղին մէջ, ԱՀ կառավարութեան օժանդակութեամբ եւ «Քաշաթաղ» բարեգործական հիմնադրամին ֆինանսաւորումով, կառուցուած էր 1 ութ բնակարանոց շէնք, 22 բնակելի առանձնատուն:
«Քաշաթաղի շրջանի հարաւային թեւին մէջ` Հակարի եւ Որոտան գետերու ներքին աւազանի հատուածին, Իշխանաձորը կը կատարէ կեդրոնի դեր: Գտնուելով Բերձոր-Կովսական, Գորիս-Հադրութ ճանապարհներու խաչմերուկին վրայ` գիւղը ունի ռազմավարական նշանակութիւն, եւ բնակավայրի զարգացումը յատուկ կարեւոր կը համարուի իշխանութիւններուն կողմէ: «Թուֆենկեան» բարեգործական հիմնադրամը եւ «Հայրենասէր» հասարակական կազմակերպութիւնը նոյնպէս նպաստած են բնակարանաշինութեան, դպրոցաշինութեան, եւ այլ ծրագիրներու իրականացման»,- նշած է Ա. Թելունցը` աւելցնելով, որ անցեալ տարուան ընթացքին գիւղին մէջ հիմնանորոգուած է դպրոցին եռայարկ շէնքը. ներկայիս ուսումնական հաստատութիւնը ունի 105 աշակերտ: Իշխանաձորի մէջ մանկապարտէզ ունենալու խնդիր սակայն կայ:
Անդրադառնալով 2018 թուականին իրականացուելիք այլ ծրագիրներու` Ա. Թելունց ըսած է, որ գիւղի տարածքին պիտի հիմնուի 10 հա նոր այգի` բերքատու ծառերով, եւ եղէգներէն պիտի ազատուի 30հա հողատարածք` բանջարեղէնի տարբեր մշակաբոյսեր արտադրելու համար: Արտադրուած միրգն ու բանջարեղէնը, նախնական պայմանաւորուածութեան համաձայն, մեծ մասամբ պիտի իրականացուի «Արցախֆրուտ» պահածոներու գործարանին կողմէ:
«Գիւղին մէջ կը կառուցուին նաեւ խոզաբուծական եւ հաւաբուծական ագարակներ, որոնց շինարարական աշխատանքները ընթացքի մէջ են: Այս բոլորը կ’ապահովեն աշխատատեղեր, շահոյթ կը բերեն համայնքին: Հակարի գետին վրայ նաեւ կամուրջ կը կառուցուի երկու թաղամասերը իրարու կապելու համար»,- մասնաւորապէս նշած է համայնքի ղեկավարը:
