Ղարաբաղեան շարժումի 30-ամեակին նուիրուած ձեռնարկներուն ծիրէն ներս Սպանիոյ մէջ ՀՀ դեսպանութեան եւ Մատրիտի «Հայ տուն» միութեան համատեղ ջանքերով Փետրուար 25-ին տեղի ունեցած է Միքայէլ Պօղոսեանի «Եթէ բոլորը» արցախեան հերոսամարտի դրուագներով նկարահանուած ֆիլմին ցուցադրութիւնը, որ ներկայացուած է հեղինակին կողմէ:
ՀՀ արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութեան փոխանցած տեղեկութիւններով՝ Սպանիոյ Թագաւորութեան մէջ ՀՀ դեսպան Աւետ Ադոնցը իր ողջոյնի խօսքին մէջ շնորհակալութիւն յայտնած է Միքայէլ Պօղոսեանին՝ ներկայութեան եւ կատարուած աշխատանքին համար, անդրադարձած արցախեան հերոսամարտին եւ շարժումի 30-ամեակին` շեշտելով հայկական համայնքներուն մէջ մշակութային եւ ուսուցողական նման ձեռնարկներու կազմակերպման անհրաժեշտութիւնը:
Ֆիլմի աւարտէն ետք կազմակերպուած է հետաքրքրական եւ բուռն քննարկում հեղինակին եւ ներկաներուն միջեւ:
Ձեռնարկին ներկայ եղած է շուրջ 150 հանդիսատես` հայ համայնքի ներկայացուցիչներ, սպանացի երիտասարդներ, համալսարականական շրջանակներու եւ ԶԼՄ ներկայացուցիչներ:
