Ուրախութեամբ կը յայտնենք, թէ Հայաստանի Ամերիկեան համալսարանը (ՀԱՀ) իր մասնակցութիւնը կը բերէ Լիբանանի մէջ տեղի ունեցող Կրթութեան եւ Կողմնորոշման (EDEX 2018) առաջին ցուցահանդէսին:
Ցուցահանդէսը, որ սկիզբ պիտի առնէ Հինգշաբթի, 1 Մարտ 2018-ին եւ պիտի շարունակուի մինչեւ Կիրակի, 4 Մարտ 2018 «Seaside Arena»-էն ներս, կազմակերպուած է Լիբանանի Կրթութեան նախարարութեան կողմէ եւ կը վայելէ բարձր հովանաւորութիւնը Լիբանանի վարչապետ Սաատ Հարիրիի:
Հայաստանի Ամերիկեան համալսարանը EDEX 2018-ին Հայաստանէն ու անդրկովկասեան տարածաշրջանէն մասնակցող առաջին եւ առայժմ միակ համալսարանն է: 25 տարիէ ի վեր ան Երեւանի մէջ գործող ուսումնական գերազանցութեան, նորարարութեան եւ հետազօտութեան կեդրոն մըն է:
ՀԱՀ-ը, հաւատարիմ իր առաքելութեան, իր դռները կը բանայ բոլորին առջեւ: Հայաստանի թէ արտասահմանի քաղաքացի ուսանողներուն կ’առաջարկուին ուսման վճարին ուղղուած այլազան կրթանպաստներ, կրթաթոշակներ ու կրթաշնորհներ: Յատկապէս Լիբանանի քաղաքացիներուն համար հետաքրքրական է «Aurora Gratitude» կրթաթոշակներու ծրագիրը:
Յաւելեալ մանրամասնութեանց համար դիմել Հայաստանի Ամերիկեան համալսարանի Ընդունելութեան գրասենեակ՝ admissions@aua.am:
