Երկուշաբթի, 22. 07. 2024

spot_img

Հայաստանի Հանրապետութեան Նախագահի Թեկնածու Արմէն Սարգսեան ՀԲԸՄ-ի Տեմիրճեան Կեդրոնին Մէջ

*ՀԱՄԲԻԿ ՄԱՐՏԻՐՈՍԵԱՆ*

Օրերս Լիբանան գտնուող եւ իր այցելութեան ընթացքին լիբանանահայ ազգային
կառոյցներու պատասխանատուներուն հետ հանդիպող Հայաստանի Հանրապետութեան նախագահութեան թեկնածու Տիար Արմէն Սարգսեան, Կիրակի, 25 Փետրուար 2018 –ի երեկոյեան այցելեց ՀԲԸՄ-ի Տեմիրճեան Կեդրոն եւ տեսակցեցաւ Միութեան ղեկավարներու եւ պատասխանատուներու հետ: Յարգելի հիւրին կ’ընկերանային ազգային բարերարներ՝ Տէր եւ Տիկին Վաչէ եւ Թամար Մանուկեանները եւ Լիբանանի մօտ Հայաստանի դեսպան Տիար Սամուէլ Մկրտչեանը:


Նախագահի թեկնածու Տիար Արմէն Սարգսեան եւ իրեն ընկերացող հիւրերը ՀԲԸՄ-ի
Տեմիրճեան Կեդրոնի մուտքին ընդունուեցան ՀԲԸՄ-ի Լիբանանի Շրջանակային
Յանձնաժողովի ատենապետ Տիար Ժէրար Թիւֆէնքճեանի եւ այլ պատասխանատուներու կողմէ եւ առաջնորդուեցան կեդրոնի «Ասպետներու սրահը», ուր թանկագին հիւրին կը սպասէին Բարեգործականի բարերարներ՝ Տէր եւ Տիկին Սարգիս Տեմիրճեան, Տէր եւ Տիկին Աւետիս Տեմիրճեան, նախկին նախարար եւ Տիկին Արթիւր Նազարեան, ինչպէս նաեւ Լիբանանի Շրջանակային Յանձնաժողովի ներկայ եւ անցնող շրջանի անդամ- անդամուհիներ, Հայ Երիտասարդաց Ընկերակցութեան Կեդրոնական Վարչութեան անդամներ, ՀԲԸՄ-ի Լիբանանի Կրթական Յանձնախումբի ատենապետուհին ու ատենադպիրը, ՀԲԸՄ-ի Վեթերաններու եւ Բարերարներու Համախմբման ատենապետը, ՀԲԸՄ-ՀԵԸ-ի Ասպետներու Համախմբման ատենապետը, ՀԲԸՄ-ի վարժարաններու Տնօրէնը, ՀԲԸՄ-ի Լիբանանի Շրջ. Յանձնաժողովի գործադիր տնօրէնուհին, ՀԲԸՄ Տիկնանց Համախմբումի ատենապետուհին եւ փոխատենապետուհին, ՀԲԸՄ- ՀԵԸ-ի «Խօսնակ» պաշտօնաթերթի խմբագիրը , ՀԲԸՄ Լիբանանի Երիտասարդ Արհեստավարժներու
վարչութեան ատենապետուհին եւ այլ պատասխանատուներ ու հիւրեր:
Ծանօթացման արարողութենէն ետք, երբ բոլոր ներկաները առաջնորդուեցան
«Ասպետներու» գլխաւոր սրահը եւ գրաւեցին իրենց տեղերը, ՀԲԸՄ-ի Լիբանանի
Շրջանակային Յանձնաժողովի ատենապետ Տիար Ժէրար Թիւֆէնքճեանի անունով խօսք առաւ Միութեան «Խօսնակ» պաշտօնաթերթի խմբագիր Համբիկ Մարտիրոսեան: Ան առաջին հերթին բարի գալուստ մաղթեց Հ.Հ. նախագահի թեկնածու Արմէն Սարգսեանին, ինչպէս նաեւ բոլոր հիւրերուն եւ ապա ներկայացուց թանկագին հիւրին կենսագրական ամփոփ գիծերը, անոր անցած հարուստ ու բեղուն ճանապարհը եւ տարիներու վաստակը:
Ան անդրադարձաւ թանկագին հիւրին կեանքի ասպարէզէն ներս ունեցած
ձեռքբերումներուն եւ կատարած իրագործումներուն, յիշատակելով անոր որպէս
համալսարանի դասախօս պաշտօնավարութիւնը՝ Երեւանի Պետական Համալսարանի, Քէմպրիճի եւ Լոնտոնի համալսարաններէն ներս, որպէս ֆիզիքոս ու գիտնական անոր ներդրումը հայրենի գիտական ոլորտէն ներս, որպէս դիւանագէտ անոր երեք անգամ պաշտօնավարութիւնը Բրիտանիոյ մէջ՝ որպէս Հայաստանի Հանրապետութեան դեսպան եւ ապա Հայաստանի Կառավարութենէն ներս Պարոն Սարգսեանի զբաղցուցած պաշտօնը՝ որպէս վարչապետ:
Ակնարկելով Սարգսեան յաջողակ գործարարի ունեցած փորձառութեան,
Հ. Մարտիրոսեան թուեց «Պրիթիշ Փեթրոլիումը», «Ալքաթէլը», «Թէլէֆոնիքան», ինչպէս նաեւ՝ «Պանք օֆ Ամերիքա Մէրրիլ Լինչ»-ը, ուր Արմէն Սարգսեան եղած է աւագ կամ գլխաւոր խորհրդատու: Ան յիշեց, թէ շնորհիւ ունեցած իր գիտական կարողութեան, Ա. Սարգսեան գիտնականը հիմա անդամ է Հայաստանի Ազգային Ակադեմիայի, որպէս Պատուաւոր Դոկտոր: Իսկ իր բոլորանուէր ու հասարակական աշխատանքներուն համար, ըսաւ, թէ Սարգսեան ՀԱՅ ՄԱՐԴԸ գնահատուած է Յովհաննէս Պօղոս Պապի կողմէ՝ «Սուրբ Գրիգոր Մեծ» մետալով եւ Ամենայն Հայոց կաթողիկոս Գարեգին Բ.ի կողմէ՝ «Սուրբ Գրիգոր Լուսաւորիչ» մետալով:
Իր խօսքի աւարտին Մարտիրոսեան ըսաւ. «Արեւելահայ բանաստեղծը կ’ըսէ. «Ուշ ուշ են գալիս, բայց ոչ ուշացած… անոնք գալիս են ճիշդ ժամանակին..», արդարեւ, որքան ճիշդ կը համընկնին այս իմաստութիւն բուրող տողերը նախագահի թեկնածու Պարոն Արմէն Սարգսեանին, որ իր ունեցած բազմաշնորհ առաւելութիւններով եւ բազմաթիւ նախանձելի բարեմասնութիւններով կը վայելէ բոլորի յարգանքն ու սէրը: Իսկ միջազգային շրջանակներէ ներս, որպէս գնահատուած ու փորձառու դիւանագէտ եւ յաջող գործարար, արժանացած է շատ շատերու դրուատանքին արժանաւորապէս ու բացառիկ յարգանքին:
Արդարեւ, տեսնելով ու գիտակցելով այս բոլորին, ուրախութեամբ կրնանք յայտարարել, թէ համոզուած ենք լաւագոյնս, որ Պարոն Սարգսեան պիտի արժեւո՛րէ Հայաստանի նախագահի պաշտօնը եւ իր ամբողջական ուժով սատար հանդիսանայ Հայաստանի վերելքին»:
Ան թարգմանը հանդիսանալով բոլոր ներկաներուն, յաջողութիւն մաղթեց յարգելի հիւրին եւ ապա հրաւիրեց Պարոն Արմէն Սարգսեանը, որպէսզի հաղորդէ իր սրտի խօսքը:
Պարոն Սարգսեան նախ շնորհակալութիւն յայտնեց Հայկական Բարեգործական
Ընդհանուր Միութեան Լիբանանի Շրջանակային Յանձնաժողովին ու անոր ատենապետ Պարոն Ժերար Թիւֆէնքճեանին, կազմակերպուած գեղեցիկ երեկոյեան համար, ինչպէս նաեւ «Խօսնակ»-ի խմբագիրին կողմէ իր հասցէին ըսուած հաճելի խօսքերուն համար եւ անդրադարձաւ նախագահական պաշտօնի առաջադրման հարցին:


Ան ըսաւ, թէ ընդառաջելով Հայաստանի նախագահ Տիար Սերժ Սարգսեանի, ինչպէս նաեւ Հանրապետական կուսակցութեան առաջարկին, ընդառաջած է եղած հրաւէրին, ելլելով պատասխանատուութեան զգացումէ եւ հայրենիքին ծառայելու գիտակցութենէ, միշտ նկատի առնելով Հայաստանի ներկայիս դիմագրաւած դժուարութիւնները, հոն տիրող իրավիճակը, Արցախեան հիմնախնդիրը, երկրէն ներս գոյութիւն ունեցող եւ լուծման կարօտ բազմաթիւ հարցեր:
Պարոն Արմէն Սարգսեան իր խօսքին մէջ կարեւորեց նաեւ Սփիւռքի դերը, աւելցնելով, թէ պէտք է զարգացնել երկկողմ յարաբերութիւնները, լսել իրար՝ միշտ յարգելով, հայրենիքի հանդէպ ունենալով յոյս ու հաւատք: «Նամանաւանդ, պէտք է զարգացնել Հայաստանի գիտական ոլորտը, պէտք է գուրգուրալ երիտասարդութեան ու անոր տաղանդին վրան, Հայաստանը պէտք է դարձնենք Երիտասարդ Հայաստան՝ միշտ ձեռք ձեռքի տուած, առանց յուսահատելու», ըսաւ Պարոն Սարգսեան:
Իր խօսքին մէջ կարեւորելով Հայկական Բարեգործական Ընդհանուր Միութեան տեղը՝ հայ իրականութեան մէջ, ըսաւ, թէ ինք ուրախ է, որ մաս կը կազմէ ՀԲԸՄ-ի Կեդրոնական Վարչական Ժողովին:
Գեղեցիկ ու տպաւորիչ երեկոն շարունակուեցաւ ընթրիքի շուրջ, ուր շատեր
հնարաւորութիւն ունեցան զրուցելու եւ ստանալու յարմար բացատրութիւններ:
Երեկոյեան աւարտին, ներկաներու մօտ կար յստակ ու մէկին համոզում. «Յարմար մարդ՝ յարմար պաշտօնի վրայ»: Պիտի ունենայինք դասախօս, Ֆիզիքոս, գիտնական, դիւանագէտ, վարչապետ եւ յաջող գործարար Հայ մարդ, որպէս նաւավար՝ Հայաստանի Հանրապետութեան խիստ պատասխանատու պաշտօնին վրայ:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին