«Ռաուլ Ուալենպըրկ» միջազգային հիմնադրամը խոր հիասթափութիւն կը յայտնէ Քնեսեթի կողմէ այս ամսուան սկիզբը Հայոց Ցեղասպանութիւնը ճանչնալու մասին օրինագիծը մերժելու առնչութեամբ: Ինչպէս կը փոխանցէ «Արմէնփրես»-ը, վկայակոչելով «The Jerusalem Post»-ը, հիմնադրամը նամակ յղած է Քնեսեթի խօսնակ Եուլի Էտելշթէյնին:
Յայտնի է, որ Էտելշթէյն տակաւիճն 2015 թուականին կոչ ըրած է երկրի կառավարութեան փոխել դիրքորոշումը Հայոց Ցեղասպանութեան հարցով:
«Ցաւօք, վերջին տարիներու ընթացքին այս քուէարկութիւնը կը շարունակուի նորէն ու նորէն, ինչպէս մշտական ծիսակարգ: Ամենայն յարգանքով սակայն, մենք չենք կրնար ատիկա հասկնալ, նոյնիսկ չխօսելով այդ դիրքորոշումը արդարացնելու մասին: Իսրայէլ կը հանդիսանայ ազգային տունը հրէական ժողովուրդին, որ տուժած է աննկարագրելի Հոլոքոսթի ժամանակ: Հայ ժողովուրդը կը հաւատայ, որ աշխարհի բոլոր ազգերը, հրէական պետութիւնը պիտի ունենան մտաւորական ազնուութիւն եւ հոգեւոր առատաձեռնութիւն` հայ ժողովուրդի սարսափելի ողբերգութիւնը ճանչնալու համար: Անշուշտ, իսրայէլական կառավարութիւնը եւ Քնեսեթը այս հնարաւորութիւնը կորսնցուցած են կրկին անգամ: Գոյութիւն չունի քաղաքական իրականութիւն, որ կրնայ ողջամիտ արդարացում ըլլալ ատոր համար: Պարոն Էտելշէյն, մենք գիտենք Ձեր անձնական աջակցութիւնը Հայոց Ցեղասպանութիւնը ճանչնալու հարցով: Մենք կը գտնենք, որ ամբողջ աշխարհը պիտի ողջունէ Քնեսեթը` համարձակ էթնիկ դիրքորոշման համար` անկախ կարճաժամկէտ քաղաքական նկատառումներէ: Կը ցաւինք, որ ատիկա դեռ տեղի չէ ունեցած»,- ըսուած է նամակին մէջ, զոր ստորագրած են հիմնադրամի նախագահ Էտուարտօ Էռնեկեանը եւ հիմնադիր Պարուխ Տօնեմպաումը:
Հայոց Ցեղասպանութեան օրը նշելու մասին օրինագիծը Քնեսեթի մէջ քննարկման դրուած էր Փետրուար 14-ին:
