Գերմանիոյ Նիւրենպերգ քաղաքին մէջ տեղի ունեցող «Պիոֆախ 2018» օրգանական սննդամթերքի ցուցահանդէսի ծիրէն ներս հայկական «Սարի թէյ» եւ «Անթառամ» ընկերութիւնները գերմանական TeeGschwendner-ի հետ համաձայնագիր կնքած են բուսական թէյի արտահանման վերաբերեալ: Այս մասին կը յայտնեն Ակբա-կրեդիտ ԱԳՐԻԿՈԼ դրամատունէն:
«Հայաստանեան երկու կազմակերպութիւններու մասին իմացած ենք NABU-ի եւ Ակբա-կրեդիտ ԱԳՐԻԿՈԼ դրամատան կողմէ իրականացուող Օրգանական գիւղատնտեսութեան ծրագիրին միջոցով: Կը կարծեմ, նախագիծը շատ լաւ հնարաւորութիւններ եւ հեռանկար ստեղծած է թէ՛ Հայաստանի մէջ օրգանական թէյ արտադրողներուն, թէ՛ մեզի համար: Այսօր երկու կազմակերպութիւններու հետ ստորագրեցինք արտահանման վերաբերեալ համաձայնագիր, բայց պիտի չսահմանափակուինք՝ միայն մեր գործընկերներէն թէյ գնելով․ մենք աւելի լայն համագործակցութիւն կը նախատեսենք:
Առաջին հերթին մեր նոր գործընկերներուն պիտի ծանօթացնենք եւրոպական շուկայի չափանիշները եւ առանձնայատկութիւնները, անոնց աշխատակիցներուն համար նաեւ տեղի պիտի ունենան դասընթացներ: Սա TeeGschwendner-ի կողմէ տարածաշրջանին մէջ իրականացուող առաջին ծրագիրն է, եւ կրնամ ըսել, որ մենք Հայաստանի մէջ գտանք այն, ինչ որ կը փնտռէինք»,- իր խօսքին մէջ նշեց TeeGschwendner ընկերութեան պատասխանատու Լուքաշ Փարոպին:
TeeGschwendner ընկերութիւնը աշխարհի 4 մայր ցամաքներու 7 տարբեր երկիրներու մէջ ունի աւելի քան 130 մասնագիտացուած խանութ:
«Սարի թէյ» եւ «Անթառամ» ընկերութիւնները անվճար օրգանական արտօնագիր ստացած են Ակբա-կրեդիտ ԱԳՐԿՈԼ դրամատան եւ NABU-ի (Գերմանիոյ բնութեան պահպանութեան միութեան) կողմէ համատեղ իրականացուող Օրգանական գիւղատնտեսութեան զարգացման ծրագիրի ծիրէն ներս:
Օրգանական գիւղատնտեսութեան զարգացման ծրագիրը կ’իրականացուի Ակբա-կրեդիտ ԱԳՐԻԿՈԼ դրամատան յաճախորդներուն համար:
