Արցախեան շարժումի 30-ամեակին նուիրուած ձեռնարկներ տեղի պիտի ունենան ամբողջ տարուան ընթացքին ե՛ւ Արցախի, ե՛ւ արտերկրի մէջ:
Ըստ «Արցախփրէս»-ի՝ այս մասին Փետրուար 19-ին կայացած մամուլի ասուլիսի ժամանակ ըսած է ԱՀ Արտաքին գործոց նախարար Մասիս Մայիլեան:
Մասնաւորապէս Փետրուար 22-ին Մոսկուայի մէջ «Ռեգնում» լրատուական գործակալութեան մէջ տեղի պիտի ունենայ կլոր սեղան` նուիրուած Արցախեան շարժումի 30-ամեակին:
Փետրուար 24-ին Պէյրութի մէջ տեղի պիտի ունենայ յորդանանցի հայ լուսանկարիչին ցուցահանդէսի բացումը, որ 1994 եւ 2016 թուականներուն Արցախի մէջ տեղի ունեցած պատերազմական գործողութիւններու ժամանակ եկած է Ղարաբաղ եւ լուսանկարած պատերազմը արտացոլող պատկերներ: Ան ցուցահանդէսին պիտի ներկայացնէ մօտ 60 լուսանկար:
Նախարարին խօսքով` «Արցախի օրերը Ֆրանսայի մէջ» ծրագրի ծիրէն ներս կազմակերպուող ձեռնարկներուն մէկ մասը եւս նուիրուած պիտի ըլլայ շարժումի 30-ամեակին:
«Տարուան ընթացքին արտասահմանի մէջ կը նախատեսուին քաղաքական, մշակութային տարբեր ձեռնարկներ, որոնց պիտի մասնակցին մեր մշտական ներկայացուցչութիւնները: Այդ ձեռնարկներուն մասնակցելու համար Արցախէն պիտի գործուղղուին նաեւ տարբեր պաշտօնեաներ: Պիտի ըլլան դասախօսութիւններ, ելոյթներ»,- ըսած է Մ. Մայիլեան` աւելցնելով, որ սա եւս մէկ հնարաւորութիւն է` ձեռնարկներու շնորհիւ տեղեկացնելու լայն հասարակութիւնը շարժումի պատմութեան, խնդիրի էութեան մասին, ինչպէս նաեւ խօսելու մեր իրաւունքներու մասին:
