Շաբաթ, 20. 07. 2024

spot_img

Վարդանանց Տօնակատարութիւն Հ.Բ.Ը.Մ. Պօղոս Գ. Կարմիրեան Վարժարանէն Ներս

Հինգշաբթի, 15 Փետրուար 2018-ին Հ.Բ.Ը.Մ.ի Պօղոս Գ. Կարմիրեան վարժարանի աշակերտները նշեցին Վարդանանց հերոսամարտի տօնը:

          Վարդանանք տեսիլք մը ունէին. անոնք նախընտրեցին իմացեալ մահը, եւ իրենց տեսիլքով է, որ ապրեցաւ եւ գոյատեւեց հայ ժողովուրդը դարեր շարունակ:  Վարդանի տեսիլքով տոգորուած Պօղոս Գ. Կարմիրեան վարժարանի աշակերտները, հայաշունչ յայտագիրով, անգամ մը եւս փաստեցին, թէ արժանի են Վարդանի թոռները կոչուելու:

          Յայտագիրի բացման խօսքը կարդաց Ա. դասարանէն Մարիլին Տէր Արթինեան: Ան իր խօսքին մէջ ըսաւ, որ Վարդանանց հերոսները սուրբեր կոչուեցան, որովհետեւ սորվեցուցին մեզի հաստատ մնալ մեր հաւատքին վրայ՝ խօսքը ուղղելով ընկերներուն ըսաւ. «Մենք ալ, ընկերնե՛ր, սիրենք մեր հայրենիքը, վառ պահենք մեր լեզուն եւ քրիստոնէական հաւատքը»:

          Ապա Ա. եւ Բ. կարգերէն խումբ մը աշակերտներ ընթերցեցին «Խորհուրդ Վարդանանց»-ը, որմէ ետք Ա. դասարանի աշակերտները ներկայացուցին հայկական պար մը եւ խմբային արտասանութիւն մը «Վարդանանց Տօն» խորագիրով:  Ապա Գ. դասարանի աշակերտները երգեցին «Իմ Հայրենեաց» երգը:

          Յայտագիրի ամէնէն հետաքրքրական եւ սպասուած բաժինը «Պատերազմի Դաշտ» խորագրով թատերական ներկայացումն էր, որ հմտութեամբ ներկայացուցին Ա. եւ Բ. կարգերէն խումբ մը աշակերտներ:  Թատերական ներկայացումէն ետք հանդէս եկան Գ. դասարանի աշակերտները «Արի Հայեր» արտասանութեամբ, իսկ Ե. եւ Զ. կարգերու աշակերտները «Հիմի Է՞լ Լռենք» եւ «Մենք Քաջ Վարդանի Տոհմէն Ենք» երգերով:  Ա. կարգի աշակերտներու «Զինուորիկ Եմ Ես» պարը խանդավառ մթնոլորտ ստեղծեց եւ անոնք արժանացան ներկաներուն գնահատանքին:

          Յայտագիրի աւարտին Ժէնի Սիմոնեան, Կալին Գալտընեան եւ Շանէլ Էլսուէյտի շնորհակալական խօսքերով փակեցին հանդիսութիւնը:

          Հուսկ, խօսք առաւ վարժարանիս տնօրէնուհին՝ Տիկին Մարալ Պալեօզեան:  Նախ գնահատեց աշակերտներուն անթերի ներկայացումը, ապա շնորհակալութիւն յայտնեց յայտագիրին պատասխանատու հայերէն լեզուի ուսուցչուհիին, որ ամենայն համբերութեամբ եւ նուիրումով պատրաստած հանդիսութիւնը ազգային գիտակցութիւն ներշնչեց աշակերտներուն:  Ապա Տիկին Մարալ եզրափակեց իր խօսքը՝ ըսելով, թէ Աւարայրի ճակատամարտը դարձաւ հայ մարդուն համար ազատ կամքի եւ ազգային ինքնաճանաչման աղբիւր եւ խրախուսեց աշակերտները, որ Վարդանի ոգիով եւ շունչով օժտուած, անոր պատգամը փոխանցեն յառաջիկայ սերունդներուն:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին