Հայկական ծագումով ամերիկացի Ճեֆրի Հարիգեան կը ղեկավարէ Միացեալ Նահանգներու ռազմաօդային ուժերու կեդրոնական հրամանատարութիւնը, կը հաղորդէ «Նիուզ»-ը:
Զօրավար-հարիւրապետ Ճեֆրի Հարիգեան պատասխանատու է արտակարգ իրավիճակներու մէջ գործողութիւններու ծրագրի մշակման եւ Կեդրոնական եւ հարաւ-արեւմտեան Ասիոյ 20 պետութիւններու մէջ օդային գործողութիւններու իրականացման համար:
Անոր հայկական արմատներուն մասին պատմած է Միքայէլ Թաթոյեանը` «Dover International Speedway»-ի տնօրէնը եւ «Dover Motorsports»-ի գործադիր տնօրէնը, որ Միացեալ Նահանգներու մէջ ունի քանի մը մրցավազքային գօտիներ:
«Armenia Proud»-ի հետ հարցազրոյցի ընթացքին Թաթոյեան պատմած է, որ կը մասնակցի ԱՄՆ Ռազմաօդային ուժերու ծրագիրին, որուն ծիրէն ներս անոնք քաղաքացիական հասարակութեան հետ յարաբերութիւնները կը կարգաւորեն:
Ծրագիրի ճեպազրոյցներէն մէկը վարած է Ճեֆրի Հարիգեանը: Թաթոյեան նշած է, որ ճեպազրոյցէն ետք ան մօտեցած է Հարիգեանին եւ ըսած, որ ինք նոյնպէս հայ է: «Մենք անմիջապէս գրկխառնուեցանք եւ իրար ձեռք սեղմեցինք: Սկսանք խօսիլ մեր նախնիներու, ընտանիքներու, սնունդի մասին: Ան հայու արտաքին ունի»,- ըսած է Թաթոյեան:
