Երուանդ Քոչարի թանգարանին մէջ Փետրուար 16-ին` ժամը 18:00-ին, ցուցադրութիւն-շնորհանդէս` «Երուանդ Քոչար. վենետիկեան քանդակի յայտնութիւնը»: Մշակոյթի նախարարութեան ֆէյսպուքեան էջէն կը տեղեկանանք, որ պիտի ներկայացուի Ժորժ Զաքարեանի դիմաքանդակը: Ան Երուանդ Քոչարի վենետիկեան շրջանի (1922-1923) եզակի ստեղծագործութիւններէն է:
2015-ին Իտալիոյ մէջ ՀՀ դեսպանատանը կազմակերպուած հանդիսաւոր արարողութեան ժամանակ Ժորժ Զաքարեանի որդին` Փաոլօ Զաքարեանը, Ե․ Քոչարի թանգարանին նուիրաբերեց հօր` իր համար սրբազան մասունք դարձած դիմաքանդակը: Այս իրադարձութիւնը պատահական չէր: 1990-ականներէն ի վեր թանգարանը հետեւողական աշխատանք կ’իրականացնէր քանդակի ձեռքբերման համար:
ՀՀ մշակոյթի նախարարութեան, «Ապաւէն» ընկերութեան տնօրէն Ա. Ղազարեանի, «Անտարես» հրատարակչութեան տնօրէն Ա. Մարտիրոսեանի աջակցութեամբ 2016-ին քանդակը տեղափոխուեցաւ Հայաստան:
Այս ստեղծագործութեան բնորդը Երուանդ Քոչարի ընկեր Ժորժ Զաքարեանն է, որ այդ ժամանակ կ’ուսանէր Իտալիոյ մէջ: Յետագային Ժորժը աշխատանքի կ’անցնի Իտալիոյ յայտնի «Հռոմ» դրամատան մէջ եւ մինչեւ 1964 թուականը կ’աշխատի որպէս դրամատան գլխաւոր տեղամասերու փոխտնօրէն:
Երկրորդ համաշխարհային պատերազմէն ետք Ժորժ Զաքարեան նաեւ ղեկավարած է ENDSI գրասենեակը, որ ԱՄՆ-էն եւ այլ երկիրներէն հաւաքուած օգնութիւնը կը հասցնէր Իտալիոյ բնակչութեան: Զաքարեան օգնած է նաեւ շատ ու շատ հայ ուսանողներու Վենետիկի մէջ:
Փետրուար 16-ի արարողութեան առցանց կապ պիտի հաստատուի նուիրատու Փաոլօ Զաքարեանի հետ:
Ժորժ Զաքարեանի դիմաքանդակը թանգարանային եզակի ցուցանմոյշ է ոչ միայն որպէս մշակութային արժէք, այլեւ Հայաստանի մէջ Քոչարի վենետիկեան շրջանը ներկայացնող որպէս միակ քանդակ: Ան իւրայատուկ է նաեւ, որ արտասահմանէն թանգարանին նուիրաբերուած առաջին ստեղծագործութիւնն է:
